EH Bildu: "Gobernuak ezin du berriro ahulenen zaintza merkantilizatu"
Etxez Etxeko Laguntza Zerbitzua kontratatzera atera du udal gobernuak. Kontratua eskaintza ekonomiko txikiena egiten duen enpresari ez emateko eskatu dute.
Pasaiako Etxez Etxeko Laguntza Zerbitzuko langileen mobilizazio baten artxiboko irudia. 
Pasaiako EH Bildu udal taldeak salatu du, Pasaiako Etxez Etxeko Laguntza Zerbitzuko (ELZ) langileek egindako grebaren ondoren, udal gobernuak zerbitzua berriro kontratatzera atera duela, eskaintza merkeena izanik kontratua eramateko aukera gehien dituena.
Bilkideen arabera, zerbitzua baldintza horietan kontrataziora ateratzeko erabakiak berriro ipintzen ditu ELZko langileak, guztiak emakumeak, “prekarietatera eraman zituen egoera berean”. Onartezintzat jo dute hori, “zaintzaileak zaintzeko inolako estrategia edota baldintzarik aurreikusi gabe kontratuan”.
“Gobernu honek ezin du beste behin ere pertsona ahulenen zaintza merkantilizatu, kontratua eskaintza ekonomiko txikiena egiten duen enpresari emanez”, mintzatu dira. Zerbitzuaren kalitatea bermatzeko, langileei prestakuntza, babesa eta, batez ere, lan- eta soldata-baldintza duinak eman behar zaizkiela uste dute.
Testuinguru horretan, EH Bilduk publikoki eskatu nahi izan die PSE-EE eta EAJri egungo kontratazio prozesua indarrik gabe utzi eta presazko beste prozesu bat has dezaten, non zerbitzuaren kalitateak, enpresak aurkeztutako proiektuak eta langileen lan-baldintzek “funtsezko pisua” izango duten kontratua esleitzeko orduan; zerbitzuaren prezioa izanik balorazio-irizpiderik baxuena.
Argi esan dute egingarria dela planteatzen dutena, eta horren adibidetzat jarri dute EH Bilduk gobernatzen duen Errenteria-Orereta udalerria, prozedura hori erabiltzen baita udal horretan. “Horretarako, beharrezkoa da borondate politikoa izatea”.
