Euskara batuari eskerrak eman dizkiote, eskuz esku
Batasunaren Bidean giza katean parte hartu dute 7.000 lagunek, Euskal Herri osotik etorritakoak. Euskara batuari gorazarre egin diote.
Antxon zapiak zerura begira jarri dituzte. Zeru ilunduak mehatxu egiten zuen giza katea hasi baino lehenago, eta abisua bete du: tanta batzuk bota ditu Batasunaren Bidean giza katea hasi baino lehenago.
Hodeiek menia eman die Errenteria-Oreretatik Donostiaraino luzatu den giza-katea osatu duten 7.000tik gora lagunei. Eskuz esku edo koloretako zapiekin, Koldo Mitxelenaren omenezko eskultura eta Donostiako Plaza Berria batu dituzte. Helburua euskara batuari gorazarre egitea zen, baita horrek ahalbidetu duen euskararen transmisioari ere.
Agirre Lehendakariko plazako arkupearen babesean, Euskal Herri osoko zazpi ikaslek testua irakurri dute, ekitaldiari hasiera emateko. Euskaltzaindiako, Euskal Herriko Ikastolen Elkarteko eta Errenteriako Udaleko ordezkariak adi entzuten ari ziren.
Brillantina tutuak irekitzeko arazotxoak izan arren, arkupean zeudenak eskulturaraino joan dira, eta modu horretan hasi da giza katea.
Geldirik, ez
Giza katea ez da estatikoa izan, bai estetikoa. Euskal Herriko 50 ikastolatik etorritako ikasleetako askok mozorrotuta parte hartu dute, kolore arragoa osatuz.
Gainera, giza-katean parte hartu ezin zutenek animatu dituzte, eta ekarpentxoa egin diote nola edo hala: klaxona jo duten autobus-gidari, furgonetadun igeltsero, edo gidari soilek; haurrak ikustera joan diren guraso edo aiton-amonak… Zerura begiratzeko beta ere izan da, ibilbide osoa jaso duen drone-a agurtzeko.
Bidean zehar nabarmena zen ikasleen askotariko jatorria: Orereta Ikastolako anfitrioiak; Araban Euskaraz-eko banderak zeramatzaten aguraindarrak; argazkietarako ongi baino hobeto posatu duten lapurtarrak; beraien futbol talde gogokoena zein den argi utzi duten ondarrutarrak…
Ekitaldiak, plazetan
Giza-katea egiteko behar zuten denbora pasatuta, bost ekitaldi egin dituzte. Errenteria-Oreretan, abiapuntuan; Antxon, Biteri plazan; eta Donostiako hiru tokitan (Herreran, Zurriola Ikastolan eta Plaza Berrian).
Ikasleek eurek antolatutako ekitaldiak izan dira, musika eta animazio pixka batekin. Errenteria-Oreretan trikitilariek egin diete harrera, eta Antxon kalejira egin dute.
Ezaugarri komunak izan dituzte ekitaldi guztiek: TikTok bat errodatu dute, Janus Lesterren Dap Dap abestiaren erritmora. Koreografiarekin bukatzerakoan, puxika erraldoiak bota dituzte, ikasleen gozagarri eta irakasleen buruhausterako.
Ondoren, nahi duenak argazkiak atera ditu photocall-ean, gaur aitortza jaso duten euskararen batasunaren bultzatzaileen irudien ondoan jarrita. Eremu bakoitzean panel bat jarri dute, hiruna bultzatzaileren argazkiekin.
Kilometroak-en barruko ekitaldia bukatzean berriro hasi du euria egiten. Behintzat, euskara eguraldiak euskara errespetatu du.
Arratsaldean, Euskaltzaindia
Euskaltzaindiako ordezkaritzak, Andres Urrutia buru, ikastolako jangelan bazkaldu du, eta ondoren Lehen Hezkuntzako instalazioak bisitatuko dituzte.
Arratsaldean, ekitaldi instituzionala egingo dute udaletxean, 17:30etik aurrera.
Gaurko ekitaldiarekin euskara batua aitortu dituzte, baita haren hamabost bultzatzaile ere: Koldo Mitxelena, Resurreccion Maria Azkue, Pierre Broussain, Jose Maria Satrustegi, Julia Berrojalbiz, Xabier Kintana, Raimundo Olabide, Julene Azpeitia, Luis Villasante, Arantxa Urretabizkaia, Henrike Knoerr, Arturo Campion, Gabriel Aresti, Jean Louis Davant eta Jose Luis Alvarez Enparantza Txillardegi.
