95 oiartzuarrek jasotzen dute etxez etxeko laguntza zerbitzua
Herriko 68 etxetan jasotzen dute, egunero, laguntza. Hemeretzi langilek ematen dute laguntza hori; lan-taldea handitu du udalak.
Etxez etxeko langileak zein Ongizate Saileko langileak, zinegotziarekin. Etxez etxeko zerbitzua ematea da, Oiartzungo Udalaren arabera, “herritar guztien ongizatea bermatzeko” oinarrietako bat.
Zerbitzu hori jasotzen duten pertsona-talde asko daude: beraien autonomia behin-behinean galdu duten pertsonak; pixkanaka autonomia galtzen ari direnak, ahal den gehien norberaren etxean bizitzen jarraitzeko; bazterkeria egoeran daudenak; adikzioak dituztenak; adingabeen zaintzan laguntza behar dutenak (guraso edo tutoreek zaintza egokia ematerik ez dutenean); osasun mentaleko arazoak dituztenak…
“Beraien ongizatea eta bizi-kalitatea hobetu eta etxekoen kontziliazioa erraztea ditu helburu zerbitzuak”, esan du udalak.
Urteko 365 egunetan ematen dute zerbitzua. “Laguntza behar duenarentzat berdin baita igandea edo osteguna izan”, esan dute.
95 onuradun
2022an etxez etxeko zerbitzua jaso zuten oiartzuarrak 95 izan ziren. 68 etxetan bizi dira onuradun horiek. Laguntza behar duten herritarren ongizatea eta lasaitasuna bermatzea da beraien lehentasuna.
Udalaren Ongizate Sailak banan-banan aztertu ditu kasuak, bakoitzaren lehentasunak zehaztuz. Zerrendatu dituzte: Jaikitzen edo oheratzen lagundu; janzten; errutinak sortzen eta mantentzen; garbiketan; otorduak prestatzen; erosketetan; paseotxoa ematen edo konpainia egiten.
“Laguntza integrala, profesionala, humanoa, gertukoa eta konfiantzazkoa ematen dute, eguneroko bizitza errazagoa egiteko”, gaineratu dute.
Hemeretzi udal langile
Udalak adierazi duenez, Oiartzun da etxez etxeko zerbitzua udaleko langileek eskaintzen duten “udalerri bakarrenetarikoa”.
Hemeretzi langilek osatzen dute lan-taldea. Horietatik 11 eguneroko lanean aritzen dira, beste bi asteburuetan, koordinatzaile bat dago, eta gainontzeko bostak ordezko lanetan aritzen dira.
“Ongizate Saileko gainerako kideen lana ere ezinbestekoa da kalitatezko zerbitzua emateko: administrariena eta gizarte langileena”, zehaztu du udalak. “Guztien artean ematen dute oiartzuarren bizi kalitatea bermatzeko funtsezkoa den laguntza hau”.
Horregatik, azken urteetan zerbitzu hori indartu du udalak, handituta.
Laguntza, denentzako
Zerbitzuaren orduko kostua 35 eurokoa den arren, pertsona bakoitzaren baliabide ekonomikoen arabera zehazten da prezioa: baliabide gutxien dituztenek 0,22 euro ordaintzen dituzte, eta diru-sarrera altuenak dituztenek, 15.
Beharra duen edonork kontrata dezake zerbitzua. Ongizate Sailera idatzi edo deitu beharko du (943 49 05 52 telefono zenbakia; eta e-posta helbidea).
