Saritutako bi film, Natura eta Ingurumeneko III. Zinema Erakustaldian
Bihar, 19:00etatik aurrera, 'Joy' eta 'Cuerdas' filmak proiektatuko dituzte Niessen zineman. Emanaldiak doakoak izango dira, aforoa bete arte.
Bihar (hilak 29), Natura eta Ingurumeneko III. Zinema Erakustaldia jasoko du Niessen zinemak, Gipuzkoako bederatzi udalerritan egiten ari diren birak geldialdia egingo du herrian. 19:00etatik aurrera, GNAT Zinemako hirugarren edizioko bi film proiektatuko dituzte. Joy eta Cuerdas filmez gozatu ahal izango da, doan gainera.
Antolatzaileek azaldu dutenez, erakustaldi honen helburua “naturarik hurbilenaren berri ematea” da, “kalitatez, pertsonok naturarekin ditugun harremanak sakonago aztertuz eta gizarteek naturarekin erlazionatzeko dituzten moduak ezagutaraziz”.
Jose Ignacio Asensio Ingurumeneko diputatuak esan duenez, “GNAT Zinema proiektua zabalik dago naturaren alde zerbait egin nahi duen ororentzat, bai naturaren defentsaren arlotik, bai sormenaren dibulgazioaren arlotik jardunda”. Diputatuak gaineratu duenez, erakustaldiak “meditaziora eta errealitateaz jabetzera” gonbidatuko du, “nor garen eta gure ingurunearekin nola erlazionatzen garen hausnartzera”.
Proiektatuko duten lehen filma, Joy, Aner Etxebarriak zuzendutakoa da, eta Ana Angulok eta Itxaso Frauk ekoitzita. Honetan, Joy emakume ugandarren istorioa jaso dute. Oraindik aske bizi diren azken goriletako batzuen babesean aritu da lanean, urte luzez. Mendi Film 2022 jaialdiko film labur onenaren saria jaso zuen ikus-entzunezkoak.
Cuerdas filma berriz, Estibalitz Urresolak zuzendu du. Film honek Ritaren istorioa kontatzen du. Parte hartzen duen emakume abesbatza desegiteko arriskuan dago, entsegu lokala alokatzeko erabiltzen zuten udal diru laguntza galdu dutelako. Ondorioz, oso kutsakorra den petrolio findegi erraldoi batean hasiko dira. Rita eta bere seme Ramon prozesu judizial batean murgilduko dira, semeak enpresan hainbat urtez lan egin ondoren hartutako gaixotasunagatik laneko baja lortzeko. Fikziozko film labur onenaren Goya saria jaso du aurten.
