Azoka eraistegatiko kalte ordainak Luzuriagara bideratuko dira
3,4 milioi euro emango dizkio ETSk Pasaiako Udalari, Azoka eraitsi izanagatiko kalte ordain gisa. Zenbateko hori Luzuriagan inbertituko dute.
Azoka zenaren orubea, obretan. 
Atzo arratsaldean izandako udalbatzarrean aho batez onartu zuen udalbatzak Pasaiako Udalak Euskal Trenbide Sarearekin sinatu behar duen hitzarmena, zeinaren bitartez udalak 3,4 milioi euro jasoko dituen Luzuriagako bulegoak birgaitzeko. Kantitate hori EH Bilduk Madrilen lortutako 6 milioiei batuko zaio higiezinean inbertitzeko.
Gauzatu ez den hitzarmen bat du udalak aurretik ETSrekin onartuta. Horretan, Antxoko Azoka eraisteagatiko kalte ordainak eraikin berri batera —Biteri plazan bat sortzea hobetsi zuen alkatetzak— bideratzea dago jasota. Izan ere, kultur eraikina eraisteko lehen eztabaidak izan zirenean, ezinezkotzat jo baitzuen alkatetzak horren ordez Luzuriaga eskuratu eta, beraz, ETSk Azokarengatik emandako dirua fabrika zaharrean inbertitzea.
EH Bilduk Legebiltzarrean Legez Besteko Proposamen baten bidez eskatu zuen Pasaiako Udalak ETSrekin sinatutako hitzarmen hori alda zedin, eta Azoka eraisteagatik jaso beharreko kalte ordainak Luzuriagara bidera zitezen. Horrela, eta parlamentuaren gehiengoaren adostasunez, eskaera aurrera atera zen. Horren harira, egindako lanarekin asebete agertu zen atzo Iraitz Pazos ordezkaria: “Harrotasunez esan dezakegu EH Bilduren lan instituzionala izan dela egoera honetara ekarri gaituena”.
