Elkargunerako estalki berri bat
2014an ekin zion Errenteriako Udalak eskola patioak estaltzeko estrategiari. Koldo Mitxelena Ikastetxekoa izan zen lehena, eta Cristobal Gamongo patioa estali zuten ondoren, iaz. Markolakoa, hirugarren da, beraz.
Markolako estalkiko lanak amaitu ditu udalak. Argazkia: Herri Bizia Eguraldi txarra egiten duenean ere, jolas, kirol eta kultur ekitaldiak aire librean egiteko aukera izango dute aurrerantzean Koldo Mitxelena ikastetxearen Markola eraikineko ikasleek, Baita agustinetako bizilagunek ere. Izan ere, ikastetxe horretako joko eremua estaltzeko lanak amaitu dituzte. Errenteriako Udalak, hezkuntza komunitateko kideekin, Agustinetako bizilagunekin, eta auzo elkarteko kideekin batera aurkeztu du estalki berria.
Udalaren ordezkari, Aizpea Otaegi alkatea, Itziar Ostolaza Hezkuntza zinegotzia, eta Eneko del Amo Hirigintza zinegotzia. Argi esan dute hirurek, “Markola ikastetxeak hezkuntza eremu duinagoa izango du aurrerantzean, eta eskola orduetan lehentasuna emango zaio ikasleen erabilerari”. Beraiek izango dira onuradun, nagusiak, patio estaliak jarduerak aire librean egiteko aukera emango dielako eguraldi txarra egiten duenean ere; onuradun nagusiak, baina ez bakarrak, Agustinak auzoko bizilagunek aurrerantzean espazio estalia izango dutelako elkargune, eskola orduetako erabileratik kanpo: “Agustinetako bizilagunek gune estali publiko bat irabazi dute, jarduerak programatu ahal izateko eskolari zentraltasuna emanda eta auzokideen topagune bilakatuta”.
Estalkia eraikitzeko 696.954,13 euroko inbertsioa egin du udalak, eta udal ordezkariek azaldu dutenez, 342.954,63 euro Errenteriako Udalak jarri ditu, eta gainontzeko 353.999,5 euro Eusko Jaurlaritzak.
Markolako eraikinaren proiektua 2019-2023 Agintaldi Planaren barruan txertatuta zegoen, eta udal ordezkariek azaldu dutenez, jarraipena eman die 2020. urtean eraikinean egindako hobekuntzei. 2014an ekin zion Errenteriako Udalak eskola patioak estaltzeko estrategiari. Koldo Mitxelena Ikastetxekoa izan zen lehena, eta Cristobal Gamongo patioa estali zuten ondoren, iaz. Markolakoa, hirugarren da, beraz, eta orain artekoen artetik handiena.
Ikastetxeko patioez gain, Beraungo Pablo Sorozabal plazako haurren jolasgunea estali zuen udalak, baita Beraungo Eestadioan estalki berria egin atletismo pistaren gainean.
Ikastetxeak, ikasleek zein auzotarrek obrak bukatu artean izan duten jarrera ulerkorra eta eskainitako lankidetza eskertu du udalak.
