Tomas Garbizuko banda, Oriora
Herriko musikariek bihar izango dute kontzertua Orioko herriko plazan. Bukatzear dira Lesoinuren barruko ekitaldiak.
Musika eskolako banda, hilaren 26an eman zuen kontzertuan. Tomas Garbizu Lezoko Udalaren Musika Eskolako bandak herritik kanpora aterako ditu bere doinu gozoak. Bihar (hilak 31, ostirala) kontzertua emango dute Orioko herriko plazan, 19:00etan hasita Orioko Danbolin Musika Eskolako bandak ere parte hartuko du saioan.
Aurretik elkar ezagutzen dira musikarien bi taldeak. Izan ere, Lesoinuren barruan Herri Eskolako jolastokian kontzertua egin zuten joan den igande eguerdian.
Lesoinu, bukatzear
Lesoinu Aste Pedagogiko eta Musikalaren egitarauaren zatirik mardulenari dagokion azken emanaldia gaur (hilak 30, osteguna) izango da Tomas Garbizuko ikasleek emanaldia eskainiko dute Gezala Auditoriumean, 18:00etan.
Egitaraua guztiz osatzeko, berriz, maiatzaren 6ra arte itxaron beharko da. Egun horretako 11:00etatik aurrera, Marcos Feijook ukelele instrumentuaren ikastaroa egingo du.
