"Pasaitarrengana hurbiltzeko" entzute ariketa abiarazi du EAJk
Aurrez aurre edo telematikoki, euren ekarpenak helaraztera deitu ditu pasaitarrak Loreto Osa Ocon jeltzaleen alkategaiak.
Herritarrekin elkartzeko prest agertu da Loreto Osa alkategaia. 
Pasaiako EAJk entzute ariketa abiatu du “pasaitarrengana hurbiltzeko”. Bizilagunak deitu ditu Loreto Osa Ocon alkategaiak euren kezka, ekarpen eta iradokizunak hari helaraztera era telematiko edo presentzialean.
Maiatzeko hauteskundeetarako programa prestatzen ari dira Pasaiako jeltzaleak, eta helburu dute bide-orri hori bizilagunen proposamenekin aberastea. “Pasaia pasaitarrekin eraikitzea da nire helburu nagusia”, mintzatu da Osa, “herritar guztiei ahotsa eman eta guztiak ordezkatu nahi ditut”.
Inkesta laburra eta “modu errazean erantzutekoa” sortu dute ekarpen horiek jasotzeko, baina beste zenbait bide ere zabaldu ditu Osak herritarrekin komunikazioa errazteko: nahi duena harekin aurrez aurre elkartu ahalko dela ziurtatu du, eta horretarako, nahiz idatziz (Whatsapp bidez) bestelako proposamenak helarazteko, telefono zenbakia jarri dute edonoren eskutara: 688 80 45 73. Postaz ere egin daiteke harremana.
Paraleloki, hainbat elkarte, enpresa eta auzotarren ordezkariekin elkartzen ari da zerrendaburua Agenda Soziala osatzeko. Aipaturiko bideen bitartez jasotako ekarpenekin elikatu nahi dute agenda hori. “Ekarpenak kontuan hartuko ditugu eta guztientzako konponbidea bilatzen saiatuko gara. Gure ateak zabalik daude eta ilusioz nago pasaitarrak entzuteko”, Osak.
