Udal funtzionarioek euren "eroste ahalmena" bermatuta nahi dute
Pasaiako Udaleko Langile Batzordeak agerraldia egin zuen astearteko plenoan. Lanpostuen balorazio berria eskatu dute.
Aitor Oteiza Langile Batzordeko presidenteak hartu zuen hitza asteartekoan. 
Pasaiako Udaleko Langile Batzordeko (PULB) zenbait kide joan den astearteko plenora bertaratu ziren, funtzionarioen lan baldintzak hobetu daitezen eskatzeko. 2023ko ordainsarien igoera onartzearen alde egin zuen udalbatzak orduan, udal funtzionarioentzat eta lan-kontratuko langileentzat. Baina “hori ez da nahikoa”.
%2,5 igoko dira, onartu berri den hobekuntzarekin, udal langileen soldatak. Igoera hori inguruko beste udaletan ere emango denez gero, Pasaiako langileen egoera parekatzeko aski ez dela ziurtatu dute PULBkoek. Izan ere, Pasaiako Udaleko funtzionarioek jasotzen duten ordainsaria ICSA Taldeak 1987an egindako lanpostuen balorazioan oinarritzen da, eta 36 urte darama balioespen berririk gabe.
2007an beste balorazio bat egiteko prozesua abiatu zen Pasaian, baina hura ez zen bukatu, langileen arabera, “borondate politikorik ez zegoelako”. Hiru hamarkada baino gehiago dituen balorazioa zaharkituta dagoela esan dute, izan ere, baloratu ziren eta eginkizunen eskuliburuan jasota dauden egitekoak aldatu egin dira ordutik, “eta ez dute zerikusirik gaur egun garatzen diren eginkizunekin”.
PULBeko presidente Aitor Oteizak lanpostuen balorazio berri bat egiteko eskaera egin zuen udalbatzarrean. “Gomendagarria ez ezik, guztiz beharrezkoa eta ezinbestekoa ere bada”. Hark eman ditu inguruko herri administrazioei buruzko datuak: “Soldata konparazioak erakusten digu Pasaiako Udalean jasotzen diren soldatak txikiagoak direla, eta kasu askotan %10etik gorakoa dela aldea. Egoera hori, ziurrenik, balorazioa eguneratu ez delako gertatzen da”.
Testuinguru horretan, azken hamarkadan funtzionarioek erosteko ahalmenaren %15 inguru galdu dute. “Eskualdeko hainbat udaletan izan den KPIaren igoeraren ondorioz, soldata igoerak negoziatu dira produktibitate osagarriaren arabera, langileek erosteko ahalmenaren murrizketa ekonomiko handirik izan ez dezaten. Pasaian inoiz ikusi ez ditugun soldata igoerak”.
