Txikitoen ahotsak Donibanera bueltaraziko dituzte bizilagunek
Hilaren 22rako egun osoko egitaraua antolatu dute Xantixak eta Meipiko Jai Batzordeak txikiteroei gorazarre egin eta kantuak betikotzeko.
Pasai Donibaneko tradizioak eta ohitura zaharrak berreskuratzea helburu duen ekitaldi berezia antolatu dute Xantixa Elkarteak eta Meipiko Jai Batzordeak, hilaren 22rako. Txikitoen ahotsek Meipi hartuko dute larunbat horretan 21:00etan, baina egun osoko egitaraua prestatu dute Pasaiako Udaleko Kultur Sailak lagunduta.
Luisma Laboa sanjuandarra da antolatzaileetako bat. Hark azaldu ditu antolatutakoaren nondik-norakoak: “Iraganean gure herriko tabernetan abesten eta entzuten ziren kanten bilduma berezia ailegarazi digute herriko adineko bizilagunek”. Beraiek, edota beren arbasoek, abestutako kantak dira horiek guztiak.
Jaso dituzten abesti guztiak jatorriz Donibanen sortuak ez badira ere, horien letrak eta kontakizunek zerikusi handia dute barrutiaren historiarekin. “Kantu horiek gure herriko bitxikeriak, pasadizoak, jazoerak, kontakizunak eta, oro har, sanjuandarren historiaren parte esanguratsu bat jasotzen dute”, kontatu du bizialgunak. Altxortzat hartu dituzte, beraz, melodiak.
Garai batean herriko txoko, elkarte eta tabernetan sustraiturik zegoena berreskuratu nahi dute larunbatekoarekin, egun batez bada ere. Belaunaldiz belaunaldi besterendu izan da Donibaneko bizilagunen kantatzeko ohitura, baina denboraren poderioz apaltzen joan da hura ere. Pozik daude antolatzaileak kanta horiek bizirik mantendu ahal izan direlako, baina ez lukete desagertzea nahi: “Hori gertatuz gero Pasai Donibaneko historiaren parte garrantzitsu bat desagertuko litzateke”.
Txikitoen Ahotsak
Kanta horiek guztiak behin berreskuratuta, herritarrei horiek eskaini eta mantentzearen aldeko saiakera egiteko, antzezlan musikatua prestatu dute. “Abesti horiekin gure herriko adineko bizilagunak omendu eta egindako lana goraipatu nahiko genuke. Euren bizitzaren parte diren kanta horiek gogorarazi nahi dizkiegu, adineko bizilagunek ere ikuskizunean parte har dezaten”.
Bertan bizi ez, baina sanjuandarrak diren bizilagun horiek ere gogoan dituzte: “Donibanetik at bizi diren sanjuandarrak gogora ekarri nahiko genituzke. Asko dira atzerrian edota Espainiako beste lekutan bizi diren bizilagunak. Horiek guztiak ere gogoratzeko tenorea izango du ekitaldiak”.
Egitaraua:
- 11:00. Itsas Mendiko txistulariekin kalejira.
- 12:00. Muxikoak.
- 12:30. Konstantzia musika bandaren kalejira.
- 19:00. Emanaldia Lintxua dantza taldearen eskutik.
- 19:30. Sardina jana.
- 19:30. Kantu jira.
- 21:00. Txikitoen ahotsa ikuskizuna.
- Oharra: Antolakuntzatik dei egin diete herritarrei arrantzalez, batelariz eta baserritarrez janzteko.
Txikitoen Ahotsak izenburua jarri diote ikuskizunari. Horren aterkipean, tabernetan sortzen zen giroa antzeztu eta omenduko dute. “Ikuskizuna antolatzeko eta bideratzeko lantalde berezia osatu dugu”, aintzatetsi du taldea Laboak “guztiok sanjuandarrak gara; herriak sortutako eta herriari eskainitako emankizuna izango da, hori baita gure lan irizpidea”.
- Horra ikuskizuna antolatu duen lantaldea:
- Zuzendaritza musikala: Ina Goikoetxea
- Agertokiko zuzendaria: Luisma Laboa
- Eszenografia arduradunak: Javier Ruiz Terroso “Bitxus” eta Javier Carrasco
- Dantzaria: Danel Castillo Arbona
- Arlo teknikoa: Zugoi empresa
- Ikuskizunean parte hartuko duten abeslariak:
- Ina Goikoetxea. Abeslaria, Kitarra eta Moldaketak (Zuzendari musikala)
- Jon Larrea: Abeslaria eta Tuba
- Nika Daguer: Abeslaria
- Jose Ramon Xoto: Abeslaria
- Jean Marie Karrikano: Abeslaria
- Imanol Goikoetxea: Abeslaria
