Andonaegi zaharberritzeko asmoen berri eman dute
Jaurlaritzak 7 milioiko inbertsioa egingo du auzoko etxebizitzak berritzeko. Udalak ur depositua eraitsi eta aparkalekuak eraiki nahi ditu.
Atzoko bisitako argazkia. 
Atzo goizean bisita egin zuten Trintxerpeko Andonaegi auzora Iñaki Arriola Lurralde Plangintza, Etxebizitza eta Garraio sailburuak, Izaskun Gomez Pasaiako alkateak, eta Loreto Osa Hirigintza zinegotziak. Bertan izan ziren, halaber, Lore Suarez, Miguel Angel Crespo eta Andrea Palomares zinegotzi sozialistak.
Eusko Jaurlaritzak 7,2 milioi euroko inbertsioa egingo du auzoko etxebizitza eraikinak eraberritzeko, eta 30 jabe erkidegotatik 21ek egin dute bat laguntzen programarekin; Bidasoa, Igeldo, Oiartzun, Andonaegi eta Urgull kaleetako 200 familia inguru atxiki dira.”Errukia” adierazi zuen alkateak atxiki ez diren hamar komunitateekiko, “behin soilik pasako den trena” baita, haren ustez, diru laguntzena.
Birgaitze integraleko proiektuak gauzatuko dira hala erabaki duten bizilagunen etxebizitzetan, efizientzia energetikoa hobetzeko jarduketetatik hasi eta igogailu berrien instalaziora arte. Laguntzei buruzko aholkularitza informazio bulegoan ari dira ematen, Andonaegi jauregiko zaindariaren etxe zaharrean. 943 00 43 05 telefonora deitu edo Whatsappa ere bidal daiteke.
Aparkaleku berria
Etxeetako jarduketa horiek bide publikoko lanekin osatzeko konpromisoa hartu zuen atzo alkateak. Udalak badu, jada, 7 milioi euroko aurrekontua duen urbanizazio proiektua, zeinak, Gomezen hitzetan, “auzoaren itxura hobetuko duen, eta baita bertako irisgarritasuna ere”.
Alkateak auzorako zaharberritze asmoei buruzko zenbait informazio aurreratu zuen atzo. Besteak beste, aipatu zuen aparkaleku eraikin bat sortuko dutela gaur egun ur depositua dagoen orubean. “Dagoeneko baditugu eraisketarako aurrekontu bi”, ziurtatu zuen Gomezek, “baina itxaron beharra dago, lehenengo zonalde guztirako plana onartu behar dugu”. Gordetegi hori eraitsi eta ibilgailuak uzteko azpiegitura sortzearen helburua auzoa kotxez hustea da.
