Gaintxurizketako "arazo larriak" herri gisa lantzeko konpromisoa hartu du EH Bilduk
"Emankorra" izan dela Gaintxurizketako bizilagunekin egindako bilera zehaztu du Mikel Arruti koalizio subiranistaren alkategaiak, eta hauteskundeen ondoren harremana mantentzeko konpromisoa hartu duela jakinarazi du.
Gaintxurizketako hainbat bizilagunekin bilera egin du EH Bilduk, auzoko arzoen gainean hitz egiteko. Argazkia: EH Bildu Gaintxurizketa auzoko hainbat bizilagunekin bilera egin zuen atzo Lezoko EH Bilduk Errekalde Hotelean. Atzoko saio hori lezoarrekin eta elkarteekin mantentzen ari den harreman sortaren barruan kokatu du, “haiekiko gertutasunaren seinale”. “Emankorra” izan dela Gaintxurizketako bizilagunekin egindako bilera zehaztu du Mikel Arruti koalizio subiranistaren alkategaiak, eta hauteskundeen ondoren harremana mantentzeko konpromisoa hartu duela jakinarazi du. Arrutik, argi esan du, gainera, “Gaintxurizketak dituen arazo larriak” ez direla talde politiko baten edo bestearen kontua, “herri gisa” landu beharreko gaia baizik, “guztiok bat eginda, konponbideak lortu arte”, eta konpromiso hori bere egin du.
Gaintzurizketa “bereizgarritasun” handiko auzoa dela nabarmendu du Arrutik, “trafikoa da izugarri baldintzatzen duen faktorea. Ibilgailuen zirkulazio handiko bi errepidek zeharkatzen dute –GI-636 eta GI–2638k– eta bi errepide horien eskumena Gipuzkoako Foru Aldundiarena da”. Lezoko lursail nagusiak dituen auzoa ere badela eta Lezoko herrigunetik aparte dagoela nabarmendu du hautagaiak, eta horren harira, ezinbesteko jo du “harremana berreskuratzea”.
Arrutirekin batera, Eneritz Arruti eta Jon Legorburu zerrendakideek hartu zuten parte atzoko bilera horretan. Bizilagunengandik jasotako kezken artean, trafikoa, errepideko pasabidea, auzoaren mantenua, garraio publikoa eta udalarekiko harremana aipatu ditu EH Bilduk.
