Hauteskunde bulegoa zabaldu du Beraunen PSE-EEk
Beraungo eta Morrongileta kaleko bulegoak astelehenetik ostiralera 10:00etatik 13:30era eta 16:30etik 19:30era, eta larunbatetan, 10:00etatik 14:00etara izango dira zabalik.
Asensio eta Palencia gaurko agerraldia. Beraun auzoan hauteskunde bulegoa inauguratu du gaur Errenteriako PSE-EEk. Galtzaraborda hiribideko 61 zenbakian kokatuta dago bulego hori, eta bertan posta bidezko botoaren gaineko informazioa ematearekin batera sozialistek udalerrirako duten proiektua zabaldu nahi dutela bizilagunen artean esan du Isaac Palencia PSE-EEren bozeramaile eta udal hauteskundetarako sozialisten hautagai denak. Inaugurazioan Jose Ignacio Asensio sozialisten ahaldungaia izan du ondoan Palenciak.
Errenterian bi eredu daudela esan du Palenciak gaurko agerraldian, “etorkizuna, bata edo bestea aplikatzearen araberakoa izango da”. Hauteskunde kanpainak “errotik ezberdinak” diren bi eredu horiek mahai gainean jarriko dituela erantsi du alkategaiak, “PSE-EErena batetik, eta EH Bildurena eta Ahal Dugurena bestetik. Nolanahi ere politika batzuen edo besteen aplikazioari lotuta egongo da etorkizuna. Maiatzaren 28an Errenteriaren etorkizuna izango dugu jokoan”.
Herritarren konfiantza “berreskuratu” nahi duela ere esan du Palenciak, “izan ere, proiektu bat dugu guztion bizi kalitatea, eskubideak, aukerak eta askatasuna hobetzeko Errenteriak behar duen eraldaketari ekiteko. Jokoan dago Errenteriak aurrera ala atzera egitea”.
Bere alderdia “EH Bildu eta Ahal Duguren alternatibatzat” aurkeztu du sozialistak, eta hauteskundetarako landu duten proiektua, “parte hartzean oinarritua, irekia, hurbila eta gardena” dela erantsi du, “proiektu horretan gainera, herritarrak dira ardatz”. Auzoen “problematika” ere aipatu du hautagaiak, “EH Bilduren eta Ahal Duguren ahaztutako arazo handiak izan baitira auzoak. Bulego hau Errenteria hobea nahi dugun guztion topagune izatea nahi dugu”.
Beraungo bulegoan zein alderdiak Morrongileta kaleko 12. zenbakian duen egoitzan egoteko konpromisoa hartu du amaitzeko Palenciak, “herritarren proposamenak edo kexak entzuteko eta kezkatzen dituzten gaiei buruz duten iritzia jasotzeko”.
Bi bulegoak astelehenetik ostiralera 10:00etatik 13:30era eta 16:30etik 19:30era, eta larunbatetan, 10:00etatik 14:00etara izango dira zabalik.
