Porrotx eta Marimotots Antxora ekarriko ditu Papineko Gazteriak
Lehen urteurrena ospatzeko egitaraua antolatu du Antxoko gazte taldeak hilaren 20 eta 22rako. Tartean, pailazoen emanaldia eta sagardotegia.
Bideoa bidali diete pailazoek.
Papineko Gazteriak Antxoko gazte taldearen lehen urteurrena ospatuko du hilaren 20 —osteguna— eta 22an —larunbata—. Lehen egun horretan Porrotx eta Marimotots ekarriko dituzte Antxora; Ibaiondo pilotalekuan Zorionak marimotots! emanaldia eskainiko dute, ostegunean, 18:00etan.
Joan den asteburuan jarri zituzten salgai sarrerak aurrez aurre, baina oraindik bada online erreserba egiteko aukera —5,55 eurotan— hala nahi duenarentzat. Antolatzaileek aurreratu dute emanaldian zuhaitz bat emango diela Porrotxek antxotarrei, eta hori probestuz lore landaketa egingo dute txikienekin larunbatean (hilaren 22an) 11:00etan, egun horretako egitarauari abiada emanez. Inauguratu berri duten ludotekaren alboko belardian.
Larunbat eguerdirako karropoteoa eta sagardotegi bazkari herrikoia antolatu dituzte. Azken horri dagokionez, Trikitxotx sagardotegi ibiltariak herri bazkaria prestatu eta zerbitzatuko du Biteri plazan izango den karpan. Helduen menuak 20 euroko prezioa du, eta 12koa haurrenak; Dani, Ibaiondo eta Kamio tabernetan eros daitezke jada tiketak. Ohartarazi dute hilaren 16a izango dela azken eguna, eta online ere badaudela salgai horiek —garestiago, Bibek kobratzen dien komisioagatik—.
Jarraian, prestatu duten egitaraua.
- Hilak 20, osteguna.
- 18:00. Zorionak Marimotots! emanaldia Ibaiondon.
- Hilak 22, larunbata.
- 11:00. Papingo zuhaitz eta lore landaketa, ludoteka berriaren belardian.
- 12:30. Karropoteoa herritik.
- 14:30. Sagardotegi bazkari herrikoia.
- 16:30. Karaokea, karpan.
- 17:00. Kuadrillategiko gazteen futbol final handia, Ibaiondon.
- 19:00. Elektrotxaranga.
- 22:30. Lehian erromeria, karpan.
- 01:30. Etxeko Dj-ak.
HITZAk osteguneko ekitaldirako hiru sarrera doan zozkatuko ditu harpidedunen artean.
