San Marko gotorlekua ostegunetik aurrera, zabalik
Hilaren 6tik 10era bitarte izango da zabalik, eta aurrerantzean astebururo urriaren erdialdera arte.
San Marko Gotorlekua San Marko gotorlekuak ateak zabalduko ditu Aste Santuan, eta hala, hilaren 6tik (osteguna) 10era (astelehena) bitartean hura bisitatzeko aukera izango da 10:00etatik 14::00etara eta 16:00etatik 18:00ak arte. Hilaren 10etik aurrera, astebururo bisitatzeko aukera izango da urria erdialdera arte. Gainera, bisita gidatu berriak jarriko dituztela martxan bertan jakinarazi du udalak, “gotorlekua eta bere ingurunea ikuspegi globalago batetik aztertzeko”. Bisita gidatu berri horren bidez, orain arte egin den ikuspegi militarretik egindako bisitaren ordez, bailararen historia eta haren bilakaera ezagutzeko aukera izango du bisitariak, gaur egungo populazioaren izaera osatu arteko bidearen informazioa jasota.
Familia giroko bertsioa ere sortu dute eta horretan, haurrei emango diete protagonismoa.
Bi hizkuntzetan egiteko aukera dago bisita horiek. Hala, 11:00etan publiko helduari zuzenduta euskaraz egingo dituzte, eta 12:00etan familiei begira euskaraz. 13:00etan publiko helduari begirakoa gaztelaniaz, 16:00etan publiko helduari zuzendua euskaraz, eta 17:00etan publiko helduari zuzendua gaztelaniaz.
Bisita gidatu guztietarako ezinbestekoa da aurretik izena ematea posta elektronikoaren bidez edo 943 44 96 38 telefono zenbakira deituta.
Aizpitarte bidegurutzean
Ostegunean bertan, Aizpitarte bidegurutzean erakusketa zabalduko du udalak San Marko gotorlekuan. Erakusketaren bidez, Aizpitarteko kobazuloak Paleolitoa aztertzeko erreferente berri bihurtu dituzten azken aurkikuntzak ezagutzera emango dituzte. Kobazuloak barrutik nolakoak diren ezagutzeko aukera emango du. Aizpitarteko haitzuloak itxita daude ikusleentzat aurkitutako labar pinturak eta grabatuak babesteko Sailkatutako Kultura Ondasun gisa kalifikatuta baitaude.
Publiko zabalarentzat antolatuta dago erakusketa, eta informazio panel, bideo, jolas, eta eskulanekin osatu dute. Erakusketaren atzean, Errenteriako Udala, Gipuzkoako Foru Aldundia, Oarsoaldea Garapen Agentzia eta Aizpitarte espeleologia taldea daude. Herriko artisauen laguntza ezinbestekoa izan dela azaldu du udalak, gainera, erakusketa, jolasak eta eskulanak diseinatzen, apaintzen eta muntatzen lagundu baitute.
Erakusketa gotorlekua irekita dagoen ordutegian izango da ikusgai.
