[Bideoa] Inoiz egin den ikurrin erraldoiena sortzeko finantzaketa kolektiboa martxan da
Gure Eskuk Tourrerako egin duen deialdiarekin bat egiteko eta ikurrinik erraldoiena sortzeko crowdfundinga iragartzeko agerraldia egin dute hamalau txirrindularik Errenteria-Oreretan.
Gure Eskuk Tourrerako egin duen deialdia babestu dute hamalau txirrindulariek, baita ikurrin erraldoiena sortzeko crowdfundingarekin. Itzuliaren hirugarren etapa Errenteria-Oreretatik abiatzeko ordu gutxi falta zirela, agerraldia egin dute gaur goizean hamalau txirrindularik. Usoa Ostolazak, Naia Amondarainek, Idoia Erasok, Eukene Larrartek, Nahia Polok, Lierni Lekuonak, Ainhoa Ostolazak, Mikel Nievek, Amets Txurrukak, Peio Goikoetxeak, Iñaki Isasik, Aritz Baguesek, Eugenio Goikoetxeak, eta Mikel Astarlozak Gure Eskuk Tourrerako egin duen deialdia babestu dute gaurko agerraldi horretan, baita iragarri ere ikurrinik erraldoiena sortzeko martxan den crowdfundinga edo finantzaketa kolektiboa.
Euskal Herria mundura leloa zuen arkuaren azpian, aurtengo Frantziako Tourra berezia izango dela esan dute Euskal Herriko txirrindulari eta txirrinduzaleentzat, izan ere, lehen hiru etapa eta bosgarrenaren zati bat Euskal Herrian izango baitira. Euskal zalegoaren berotasuna aipatu dute Astarlozak euskaraz, eta Ostolazak (Usoa) gaztelaniaz egindako mintzaldian, eta Tourrari ongi etorria egiteko deia luzatu dute. Gainera, Grand Departekin bat eginez, Gure Eskuk egindako deialdiari bultzada eman nahi diotela erantsi dute. Astarlozaren esanetan, “aukera paregabea da Europako txoko honetan zazpi lurraldez osatutako herri bat dagoela esateko, nortasun propioa duena, Europako hizkuntza zaharrenarekin bizi dena, bere burua gobernatu nahi duena, kirolzalea, eta hori dena harrotasunez bizi duena”.
Hori horrela, Tourra Euskal Herrian den egun horietan errepide bazterretara ikurrinekin hurbiltzeko deia egin dute gaurko agerraldian txirrindulariek, “beti bezala, euskal zalegoa ezaugarritzen duen errespetuzko jokabidearekin, txirrindulariak animatuz, baina haien bidea oztopatu gabe”.
Ikurrin erraldoiena sortzeko deialdiarekin ere bat egin dute halaber, eta horretarako martxan jarri den finantzaketa kolektiboaren berri eman dute (hemen klik eginda informazio guztia), Bilbotik Baionara erabaki nahi duen nazioa dagoela nabarmenduta amaitzeko: “Zabal dezagun lau haizetara zazpi lurraldeko herri honek erabakitzeko eskubidea daukala”.
