Kote Cabezudo auziaz arituko dira Gaztañon
Kote Cabezudoren biktimentzat justizia plataformako kide bat izango da hizlaria.
Taldekoek egindako elkarretaratzea. Argazkia: Iñaki Agirre, Irutxuloko Hitza. Hitzaldi zikloarekin jarraitzen du Gaztañoko auzo elkarteak. Oraingoan ere jendartearen interesa piztu duen eta egunerokotasuna duen gaia aukeratu dute, izan ere, Kote Cabezudo auziaz mintzatuko dira. Hitzaldia hilaren 14an izango da, ostirala, 19:00etan hasita Gaztañoko auzo lokalean.
Kote Cabezudoren biktimentzat justizia plataformako kide bzt izango da hizlaria. Donostiako First Models agentziatik pasatako hainbat modelori egindako sexu abusuengatik eta haien irudiak interneten zabaltzeagatik epaitu zuten. 2013an jarri zituzten lehen salaketak haren kontra, eta ia hamar urte geroago eman dute ebazpena. 28 urte eta bi hilabeteko espetxe zigorra ezarri zioten, hainbat deliturengatik: bortxaketa bat, sexu abusu bat, haur pornografiari lotutako sei eta modeloei iruzur egiteagatik beste bi delitu. Hamazazpi emakumeren salaketak hartu zituzten kontuan epaiketan.
Akusatuta zegoen beste 217 delitugatik absolbitu egin zuten.
