Hiru pertsona atxilotu dituzte, haxixa Oiartzunera ekarri eta saltzeagatik
Espainiako Poliziak 30 eta 32 urte arteko hiru pertsona atzeman ditu. Malagatik ekartzen zuten droga, eta gero Gipuzkoan zabaldu.
Atzemandako materiala [Arg.: Espainiako Polizia]. Espainiako Poliziak 30 eta 32 urte arteko hiru lagun atxilotu ditu Donostian. Haxixa Malagatik (Espainia) Oiartzunera eramatea leporatzen diete, eta bertatik Gipuzkoa osora zabaltzea, herrialdeko txikizkako saltzaileen bitartez.
Donostiako 5. Instrukzio Epaitegiko epaileak espetxeratu egin ditu hiru atxilotuetako bi, eta kautelazko neurriekin aske utzi du hirugarrena.
Santiago operazioa izena jarri diote, eta polizia iturriek adierazi dutenez, iazko urrian hasi zen. Hiru gizonek ibilgailuak alokatzen zituzten, Malagara joan, haxixa erosi, eta Oiartzunera ekartzeko.
Atxiloketak pasa den martxoaren 29an egin zituzten, “frogak bildu ondoren”. Taldearen ustezko buruaren etxea miatu zuten, halaber.
Miaketan, 30 kilogramo haxix eta 33 gramo speed konfiskatu zituzten. Gainera, 1.250 euro, baskula bat, dirua kontatzeko makina bat, geolokalizatzeko bi gailu, lau eskuko telefono eta SIM txartel bat atzeman zizkieten.
