Bizardiaren urteroko mendi ibilaldia hilaren 23an izango da
Aurtengo ekitaldia 42.a izango da. Oiartzungo plazatik abiatuko dira, goiz, eta 22 kilometroko mendi-buelta egingo dute, herrian zehar.
Plazatik abiatuko da ibilaldia. Bertan izango da izen ematea. Bizardia elkarteak mendi ibilaldia prestatu du hilaren 23rako —datorren asteko igandea—. Aurtengo a 42. ekitaldia izango da; iaz berreskuratu zuten, pandemiak eten ondoren.
Ohikoa duten bezala, mendizaleak Done Eztebe plazatik aterako dira, banaka edo taldeka. Bertan eman beharko da izena; prezioa 5 eurokoa izango da. 14 urtetik beherakoentzako doan izango da.
Ibilbidea 22 kilometrokoa izango da, eta bost ordutan —gutxi gorabehera— bete ahal izango da. Bizardiak ibilbidearen xehetasunen berri eman du:
Hasteko, Iturriotztik, Sarobe Erreka gurutzatuz, eta Arbide baserria gaindituta, Beringarate aldera ailegatuko dira partaideak. Han Sarjinako zulo (kanpotik arrunta dirudien arren, barrutik edertasun handiko lekua da) ondotik Santa Engrazira. Hemen, bide ahaztu bat berreskuratuz, Susperregi zaharrera iristen da, non lehenengo kontrola izango da zain. Hurrengo pausoak eramaten gaitu Malbazarreraino; gero Idurietako borda pasata, Sorondo dugu. Jarraian, oso ezaguna ez den bide batetik Karrikara. Gutxi falta da: Goiko etxe, Isatse eta Bizardia Elkartera.
Antolatzaileek gehitu dutenez, ekitaldi honetan ibilbidea pasatzen den hainbat txokoetako informazioa emango dute: karobiak, errekak, Sarjinako zuloa…
Gainera, beste ohitura bat berreskuratuko dute: bukaerako hamaiketakoa. Bertan ibilbidea komentatu ohi dute, mokadutxo artean, ekitaldia “giro onean” bukatzeko.
