130 oiartzuarrek erabili dute Mugiment Kirol Txartela
Otsailaren 1ean indarrean jarri zenetik, 130 oiartzuar joan dira Araba, Bizkaia eta Gipuzkoako beste udalerrietako kiroldegietara, ariketa fisikoa egitera.
Mugiment Kirol Txartelarekin Errenteria-Oreretako (irudian), Lezoko eta Pasaiako kiroldegietan sar daiteke, besteak beste. Oiartzungo Udala pasa den otsailaren 1ean sartu zen Mugiment Kirol Txartelaren barruan. Modu horretan, Araba, Bizkaia eta Gipuzkoako beste 88 udalerritako kiroldegiak erabil ditzakete Elorsoroko abonatuek.
Lehen bi hilabeteak pasatuta, balantzea egin du udalak. Jakinarazi dutenez, 130 oiartzuar izan dira beste herrietako kirol instalazioetara ariketa fisikoa egitera.
“Ariketa fisikoa sustatzea, kirol-espazioetarako sarbidea erraztea eta kirol-eskaintza handitzea da proiektu honen helburua”, gogorarazi du Oiartzungo Udalak.
Kontsultak, aplikazioan
Beste kiroldegiak erabili ahal izateko, mugikorrean KirolTxartela Mugiment aplikazioa deskargatu eta erabiltzailearen datuak sartu beharko dira.
Aplikazioan bertan ikus daitezke beste herrietako zein kirol instalazio eta zerbitzu erabili daitezkeen eta zein ordutegitan. Informazio hori ere webgunean ere kontsultatu daiteke.
Beste udalerri bateko kiroldegi batera joatean, sarreran aplikazioko txartel birtuala erakutsi beharko da, baita nortasun agiria ere.
