Eskualdeko bost establezimenduk Repsol Gidaren 'eguzkitxo' bana jaso dute
Pasai Donibaneko hiruk eta Oiartzungo beste bik jaso dute "irribarrea sorrarazten duen txokoa"-ren bereizgarria.
Alabortzako kantina da 'Eguzkitxoa' jaso duenetako bat. Zortea dutenentzako, opor garaia da aste hau, eta askok erreferentziak bilatzen dituzte. Mundu mailako gidarik famatuenetako bat da Michelin Gida, eta haren gisakoa da Repsolena, Espainiako Estatuari mugatutakoa.
Gidak hainbat kategoriatan banatzen ditu gomendioak, eta horietako bat Eguzkitxoak dira. Repsol Gidak horrela deskribatzen du Eguzkitxoa kategoria: “Irribarrea sorrarazten dizun leku bat da, bere hurbiltasunagatik, proposamen gustagarriagatik eta giro onagatik liluratzen zaituena. Lagunei iradokitzeko eta erreferentzia-puntu gisa gordetzeko toki bat da”.
Oarsoaldean bost establezimenduri eman dizkiote Eguzkitxoak: hiru Pasaian daude —Donibanen, zehazki—, eta beste bi, Oiartzunen. Bakoitzari buruz iruzkin bat egin dute gidan.
Pasaia
- Ontziola: “Pasaian eguna igarotzea hain da ohikoa Gipuzkoatik igarotzen diren turista guztientzat, ezen eskertzekoa baita bertakoentzako pentsatutako eguneroko menu bat aurkitzea. Gainera, porturako bista onak ditu. Bere izenaren esanahia baleak ehizatzeko itsasontziak eraikitzen ziren ontziolatik dator. Horri ohore eginez, lokala itsasotik metro gutxira dago. Zapore handiko janari tradizionala du ezaugarri, baina diotenez, bizimodu moderno honetara ere eguneratzen ari dira eta etengabe ari dira plater berriak gehitzen, gaur egungo jendea ohituta baitago plater berri horiekin”.
- Alabortzako kantina: “Puntetako oinezkoentzako bidean kokatua, txosna hau parrilan egiten dituen sardinengatik da ezaguna. % 100 konpostagarriak diren ontziak baino ez ditu erabiltzen. Kokagune paregabea”.
- Piedade izozki-denda: “Pasaiako artisau-izozki denda txiki bat. Izozki krematsuak, kalitatezkoak eta zapore ugaritakoak dauzka; udako arratsalde batean herri bitxi honetan paseatzen ari zarela dastatzeko ezin hobeak”.
Oiartzun
- Intxixu jatetxea: “Oiartzungo janari-etxe bat, betikoa, zerbitzu atsegin eta arinarekin. Eguneko menu eta asteburukoengatik nabarmentzen da, plater aukera handia duena”.
- Pikoketa: “Aiako Harria Parke Naturalean dagoen terrazadun janari-etxea. Sukalde tradizionala, babarrun-jateak, eguneko menuak eta asteburuetakoak. Taberna zerbitzua du baita ere”.
Eguzkitxoak banatzeaz gain, Repsol Gidak beste hainbat establezimendu gomendatzen ditu, eta udalerriei buruzko erreportajeak ere igotzen ditu bere webgunera.
