Espainiako Gobernuaren ordezkaritzak hilabete eman dio Oiartzungo Udalari oroimenaren webgunea moldatzeko
'Biktimen Legea urratzen" duela eta, mehatxu egin dio Oiartzungo Udalari, "ETAko biktimak eta kideak berdintzen" dituelako.
Aste honetan Galdakaon leherrarazi duten polemika Oiartzunera iritsi da. Espainiako Gobernuak Araba, Bizkaia eta Gipuzkoan duen ordezkaritzak hilabete eman dio Oiartzungo Udalari, oroimenaren webgunean “ETAko biktimen eta etakideen artean egin duten berdintzea” erretira dezan.
Oiartzungoaz gain, Orio, Galdakao, Hernani, Amasa-Villabona eta Azpeitiko udalei ere ekintza legalekin mehatxu egin die. Gobernuaren ordezkaritzaren esanetan, “ETAko kideek eskubideen urraketak pairatu zituztela agertzen da”.
“Web orrialde horietan”, gaineratu dute, “espetxeratzeak gatibualdi bezala definitzen dira, nahiz eta espetxeratze horiek zuzenbide estatu demokratiko baten zigorren ondorio izan ziren”.
Iturri berak esan duenez, Tolosa eta Erandioko udalen webguneek ere bai antzeko edukia dute. “Ordezkaritzak frogatu du udal horiek eman dituztela orrialde horiek desaktibatzeko aginduak”.
Beraien esanetan, Terrorismoaren Biktimen Aitortza eta Babes Osorako Legearen 61. artikulua urratzen du “berdintze” horrek. Horregatik, udal horiei eskatzen die “ETAko kideak, Justiziarengandik ihes egin dutenak edo terrorismoagatik zigortuak” zerrendetatik ken ditzan.
220 izen
Aranzadik udalaren enkarguz egindako webguneko Gertuko memoria izeneko zerrendan 220 izen aurki daitezke, bakoitza bere azalpenarekin.
Horrez gain, bi biografia aurki daitezke. Alde batetik, Esteban Muruetagoienarena, poliziaren eskutik jasandako torturen ondorioz hil zen medikuarena. Bestetik, Bixente Perurenarena, GALek Hendaian hil zuen iheslariarena.