Izaskun Gomez buru duen zerrenda "zintzoa" aurkeztu du PSE-EEk
Izen berri eta aurretik ere ardura politikoak zituztenekin osatu dute hautagaien zerrenda. "Pertsona zintzoak dira", mintzatu da burua.
PSE-EEren zerrendako lehenak, gaur goizeko ekitaldian. 
Gaur goizean Trintxerpeko Alkateordetzan aurkeztu du Pasaiako PSE-EE alderdiak maiatzeko hauteskundeetarako hautagai zerrenda “zintzo, prestu eta trebatua”. Izaskun Gomez alkatetzarako berrautagaiak eta zerrendaburuak eman ditu gainontzeko hamaseien izen-abizenak.
Eledunak goraipatu du zerrenda horretan “esperientzia handia” duten pertsonak daudela, bai arlo pribatuan eta baita publikoan ere, eta ibilbide politiko luzea duten pertsonak ere biltzen dituela horrek. “Pertsona zintzoak dira”, mintzatu da Gomez, “Pasaiaren alde lan egiteko eta udalerria hobetzeko behar diren proiektuak bultzatzeko gai direnak eta lan egiteko prest daudenak”.
Alkatetza berresteko hautagai sozialistak adierazi du “Pasaiak behar duena” dela korporazio gorria, onartuta dauden proiektuek, abian daudenek eta finantzaketa dutenek, “etenik gabe aurrera” jarrai dezaten. Alkateak azken zortzi urteotan herriaren eraldaketa bultzatzeko martxan jarri diren proiektu batzuk zerrendatu ditu gaur: Antxoko topo geltokia eta zubibidea eraistea; Andonaegiko laguntza plana; San Pedroko Lonjako plaza eta estalkia; Luzuriagako zentroa eta Adinberri.
Horien alde lanean jarraitzeko aukezturiko zerrendan, buruaz gain, egungo korporazioko kideak ere badaude, hala nola Andrea Palomares, Lore Suarez, edo Miguel Angel Crespo. Hautagaitzak Itziar Barragan, Ayelen Torrado eta Jorge Aguayo trintxerpetarrak ere hartu ditu bigarrenez, eta Jokin Babaze, M. Angeles Alvarez eta Mikel Abascal antxotarrak gehitu dira estreinakoz hautagaitzara. Bixen Itxaso alkate ohiak itxi du zerrenda, ohorezko hamazazpigarren postuan.
Lehen hamarrak —Ayelen Torrado izan ezik, ezin izan baitu bertaratu— gerturatu dira goizeko ekitaldira, eta horien ogibide eta izandako ardura politiko nahiz interesekoa izan daitekeen bestelako informazioaren errepasoa egin du Gomezek.
- Izaskun Gomez.
- Andrea Palomares. Industria ingeniaria eta proiektuen zuzendari gisa lanean ariturikoa enpresa pribatuetan. Obra eta Zerbitzuen eta Kultura eta Hezkuntzaren zinegotzia da Pasaian 2020tik, eta baita Trintxerpeko alkateordea ere.
- Lore Suarez. Zientzia Politikoetan eta Soziologian lizentziatua. Zinegotzia Pasaian 2000tik. Ibilbide politiko luzean zehar ardurapean hartu izan ditu, besteak beste, honako sailak: Mugikortasuna, Udaltzaingoa, Kirola, Komertzioa, Giza Baliabideak eta Antolakuntza eta Pasaia Musikal. Horrez gain, Gipuzkoako Batzar Nagusietako batzarkide ere bada 2007tik.
- Migel Angel Crespo. Geografia eta Historian eta Politika eta Soziologian lizentziatua. Foru funtzionarioa, Herri Administrazioan eta Hirigintza Zuzenbidean aditua. Gaur egun, Gipuzkoako Foru Aldundiko Lurralde Antolamenduko zuzendaria eta Pasaiako Udaleko zinegotzia da, 2019tik. Euskara eta Hirigintza eta Ingurumen Batzordeko kide ere bada.
- Jokin Babaze. Zuzenbidean lizentziatua. Pasaiako Udaleko teknikari juridikoa. Antxotarra.
- Itziar Barragan. Gizarte Lanean diplomaduna, Gizarte Langilea. Pasaiako Udaleko zinegotzia 2015etik.
- M. Angeles Alvarez. Psikologian lizentziatua. Psikologia klinikoan aditua eta indarkeria matxistaren arloko hezitzailea. Antxoko Bekoz Beko elkarteko kidea.
- Ayelen Torrado. Zuzenbidean Graduatua. Alkatetzako idazkaria 2015etik.
- Mikel Abascal. Kazetaritzan lizentziatua, Gipuzkoako Foru Aldundiko prentsa aholkularia.
- Jorge Aguayo. Euskotreneko langilea, Gipuzkoako errepide arduraduna. Pasaiako Udaleko zinegotzi izandakoa 2019tik 2020ra.
- Beatriz Rodino.
- Jose Mariño.
- M. Luisa Villanueva.
- Antonio Barragan.
- Manolo Riveiro. Pasaiako zinegotzia izandakoa 20tik gora urtez, eta gobernuko zinegotzia alkatea Bixen Itxaso zela.
- Itziar Badiola.
- Bixen Itxaso. Pasaiako alkatea 95-99 agintaldian eta, ondoren, zinegotzi izandakoa beste bi legegintzalditan. Eusko legebiltzarkidea.
