Xoxolur, Leintz-Gatzaga aldera igandean
Izen ematea zabalik da, ostegunera arte: Orki tabernan edo Xoxolurren posta elektronikoaren bidez egin daiteke.
Martxoaren 12an egin zuten azken irteera Xoxolurrekoek, Erlaitzera. Sasoiko zazpigarren irteera egingo du Xoxolur Mendi Klubak igandean (hilaren 23an): Leintz-Gatzaga-Aitzorrotz (736 metro)-Eskoriatza bidea egingo dute. 2-3 orduan egiteko bidea da, betiere haurren erritmoa errespetatuz.
Zabalik da izena emateko aukera, ostegunera (hilaren 20ta) arte. Bi bide daude izen ematerako: Orki tabernako zerrendan apuntatuta, edo Xoxolurren posta elektronikora idatzita. Gazteek 8 euro ordaindu beharko dituzte irteerara joateko, helduek 10, eta familia ugariek 36.
Leintz-Gatzaga aldera joateko, igandeko 08:30ean gelditu dira Xoxolurrekoak, Ijurkoko kioskoa zegoen tokian. Bidea egin, eta ibilbidearen inguruko herri bateko pilotaleku estalian bazkalduko dute (bazkaria eraman behar da), ondoren han jolasean aritzeko. 18:00ak aldera izanen dira Lezon bueltan.
Beti bezala, bi motxila eramatea aholkatu dute Lezoko mendizaleek. Bat, ibilbidean bertan erabiliko dena (hamaiketakoa, ura edo txamarra eramateko), eta bestea aldatzeko arropa eta oinetakoak, nahiz bazkaria izango dituena.
Liburuaren Eguna
Igandea, Xoxolurrek irteera egingo duen eguna, Liburuaren Nazioarteko Eguna da. Horren harira, eta iaz egin bezala, bidaiarako beste proposamen bat egin dute taldearen gidariek: partaideei eskatu diete etxetik gustuko duten libururen edo ipuinen bat eraman dezatela. Hala, bazkalostean, biribilean jarri eta liburua zergatik izan den hautatua xume azaltzeko aukera izango dute horien jabeek. Ondoren, liburuak biribilaren erdialdean jarri, eta nahi duenak besteek eramandako libururen bat hartzeko aukera izango du: labur esanda, liburuen trukea egingo dute. “Xoxolur mendi taldea, mendi talde bat baino zerbait gehiago da!”, esan dute.
