Zaleen babesa eskatu du Touringek
Erabakigarria da asteburuko partida Touringeko Gizonen Hirugarren Mailako taldekoentzat. Hori izango da azkena, eta azken aukera ere jaitsiera postuetatik irten eta maila mantentzeko.
Zaleei animatzera joateko eskatu die elkarteak, etaautobusa antolatu du Urdulizera larunbaterako. Erabakigarria da asteburuko partida Touringeko Gizonen Hirugarren Mailako taldekoentzat. Hori izango da azkena, eta azken aukera ere jaitsiera postuetatik irten eta maila mantentzeko. Irabazi ala irabazi, ez da beste aukerarik mailari eutsiko badiote. Hiru puntuak poltsikoratzea ezinbestekoa du Touringek larunbateko partidan, baina ez nahikoa. Hamalaugarren dira gorritxoak sailkapen taulan (hamasei talde dira, eta azken hiruak jaisten dira) 29 punturekin, eta beraz, hamabigarren den Arrigorriagako (Bizkaia) Padurak galdu egin behar du (31 puntu), eta Azpeitiako Lagun Onak —hamahirugarren taulan, 30 punturekin—galdu edota berdindu egin behar du. Irabazteaz gain, beste taldeen emaitzak ere izango du eragina mailari eusteko.
Etxetik kanpo izango du partida Touringek, Urdulizen aurka, eta partidaren garrantzia aintzat hartuta, autobusa antolatu du kirol elkarteak, zaleek berotasuna adieraz diezaieten jokalariei.
Urdulizek ziurtatua du maila dagoeneko. Larunbateko 18:00etan izango da partida Urdulizen (Bizkaia), eta autobusa Fanderiatik irtengo da 15:45ean. Izen ematea Aterpe higiezinen agentzian egin behar da (Santxoenea kalea 27-29). Helduek 10 euro ordaindu behar dute sarrera eta bidaiarengatik, eta 18 urtetik beherako gazteek, berriz, 5 euro. Hirugarren Mailako gainontzeko partidak ere ordu horretan hasiko dira, beraz, larunbatean bertan erabakiko dute emaitzek gorritxoen patua.
Touring Futbol Elkarteak zale guztiak deitu ditu Urdulizera: “Irabazi behar dugu, eta zaleen berotasuna eta animoak ezinbesteko dira”.
