Euskara sustatzeko plan berria, martxan
Herritarrekin batera osatu nahi dute plana. Hasteko, galdetegi bat zabaldu dute, aurreko planaren balorazioa gertutik ezagutzeko.
Oiartzungo Euskara Batzordeko kideak, 'Euskaraz urtabe' prozesuaren aurkezpenean. Oiartzungo Udala Euskararen Plan Estrategiko berria diseinatzen hasi da. Herritarren parte hartzea izango da oinarrian. Euskaraz urtabe jarri diote izena prozesuari, uzta oneko aro esan nahi baitu urtabe hitzak.
Bi fasetan banatu dute prozesua. Lehenengoak Nondik gatoz? galderari erantzungo dio. Aurreko planaren balorazioa egingo dute galdetegi baten bidez (esteka honetan aurki daiteke euskaraz, eta hemen gazteleraz); galdetegia oiartzuarren artean zabalduko dute, ahalik eta iritzi gehien biltzeko asmoz.
Horrekin batera, herritar batzuei elkarrizketa xeheagoak egingo dizkiete, iritzi horiek gertutik ezagutzeko. Bestalde, hizkuntzei dagokienez, egungo Oiartzungo datuen bilketa egingo dute, euskararen egoera zehatza neurtzeko asmoz. Horietatik ateratakoarekin diagnostikoa osatuko dute.
Hori bukatuta, Nora goaz? fasea hasiko dute. Ekainean, irailean eta urrian egingo dute. Herritarrak hainbat arlotako lan-mahaietan bilduko dira eta proposamenak egin ahal izango dituzte, gako nagusiak identifikatzearekin batera. Saio irekiak izango direla nabarmendu dute.
Bukatzean, jakinarazi dutenez, parte-hartzaile guztiak azken saio batean bilduko dituzte, jasotakoen inguruko iritziak entzuteko eta plana sortzeko azken ideiak biltzeko. “Oiartzuar ororen hitza entzunda diseinatuko da datozen bost urteetarako plana”, esan du Oiartzungo Udalak.
Urtabe
Urtabe hitzak uzta oneko urte esan nahi du. Izen horren aukeraketa azaldu du udalak: “Herritarren inplikazioari esker fruituak emango dituela sinetsita abiatzen dute bidea, eta hizkuntzaren normalizazioan urrats esanguratsuak emango direlako”.
Oiartzungo Euskara Batzordeak herritar orori dei egin die prozesuan parte har dezaten. Lehen fasea hilabete honetan bertan hasiko da, eta herritarrek beraien postontzi elektronikoan edo sakelekoan jasoko duten galdetegiari erantzutea izango da lehenengo urratsa.
