Bi udalbatzar egingo dituzte aste honetan
Asteazkenekoa ohiko udalbatzarra izango da, eta migratzaileei buruzko mozio bat aztertuko dute. Ostegunekoa, berriz, hautets-mahaiak osatzekoa.
Agintaldia bukatzeko hilabete pasatxo bakarrik falta da. Etzi —asteazkena, hilak 26— udalbatzarra egingo dute, hamazazpi gai aztertzeko. 18:00etan hasiko da, eta gaien artean mozio bat aztertuko dute, migratzaileen erregularizazioari dagokiona. Puntu guztiak ikus daitezke albistearen behealdean.
Ez da asteko pleno bakarra izango. Izan ere, biharamunean, ezohiko batzarra egingo dute, 09:30ean. Osteguneko udalbatzarrak puntu bakarra izango du, herritar askok ikara diona: udal hauteskundeetako mahaien osaketa.
Gai-zerrenda (asteazkenekoa)
- Aurreko batzarrari dagokion aktaren onarpena.
- Grupo Oarso taldearen Espainiako estatuan migratzaileen ezohiko erregularizazioari buruzko mozioa, EH Bildu udal taldeak bereganatutakoa.
- 2022-2024 epeko diru-laguntzen plan estrategikoaren 2. aldaketa.
- Eragin Linguistikoaren Ebaluazioa arautzeko ordenantzaren hasierako onarpena.
- 2023-24 ikasturtean euskara ikasteko eta hobetzeko diru-laguntzak arautzeko oinarri bereziak onartzea eta deialdia egitea.
- Energia elektrikoa, gasa, ura eta hidrokarburoak garraiatzeko instalazioen aldeko udal-jabari publikoaren erabilera pribatiboagatiko eta aprobetxamendu bereziagatiko tasa ezartzea eta antolatzea.
- Energia elektrikoa, gasa, ura eta hidrokarburoak garraiatzeko instalazioen aldeko udal-jabari publikoaren erabilera pribatiboagatiko eta aprobetxamendu bereziagatiko tasa arautzen duen Ordenantza Fiskalaren Proiektua behin-behinekoz onestea.
- Oiartzungo udalerrian hiri-garbiketako eta etxeko hondakinen bilketa eta garraioko zerbitzua. 1. luzapena.
- Elorsoro Kiroldegia, Madalensoro Pilotalekua eta udako igerilekua udal instalazioen emakida kontratuan oreka ekonomikoa berrezartzeko eskaera (2022ko 4. hiruhilabetea).
- Altamira baserriaren albotik pasatzen den Otsakane herri-bidearen (383-384) trazadura desplazatzeko lur trukaketa gauzatzeko 45 m. luzera eta 60,50 m² duen zatia desafektatzeko hasierako onarpena eta lur trukaketaren proposamenaren aldeko iritzia.
- Oarsoaldea S.A. eta Oiartzungo Udalaren arteko hitzarmenaren onarpena, elkartearen 2023 urteko gestio planari buruzkoa.
- Oiartzungo kultur eragileen saretzea aktibatzeko, kultur eragileen eta kulturzaleen bilgunea osatzeko eta beraien arteko elkarlana bideratzeko Oiartzungo Udala eta Kulturaz Bete Arte elkartearen arteko lankidetza-hitzarmenaren eta gastuaren onarpena eta lehen ordainketaren ebazpena.
- Soinuenea Fundazioa eta Oiartzungo Udalak sinatutako lankidetza-hitzarmenaren modifikazioa onartzea eta diru-laguntza ordaintzeko eskaera ebaztea.
- Arautuko gabeko musika-irakaskuntza elkarlanean sustatzeko, Oiartzungo Udala eta Ibargain Musika Eskolaren arteko lankidetza-hitzarmena onartzea.
- 2023 ekitaldiko 3. kreditu aldaketa onartzea. 2023KH020003.
- Hainbat organoen jardueraren jarraipena.
- Eskari-galderak.
