Aurtengo xanistebanetako kartel lehiaketa hasi da
Maiatzaren 31 izango da kartela aurkezteko azkeneko eguna. Baldintza eta oinarriak publikatu ditu udalak. Bihar, jai batzordearen bigarren bilera.
Jai batzordeko kide batzuk iazko kartela aukeratzen. Xanistebanak iragartzeko kartel lehiaketa martxan dela iragarri du Oiartzungo Udalak. Maiatzaren 31 baino lehen aurkeztu beharko dira lanak, udaletxeko harreran.
Bost sari banatuko ditu Udalak, lau dirutan eta bat formakuntza beka gisa: kartel irabazlea (600 euro); oiartzuar onena (300 euro); bi accesit (bakoitza 50 eurokoa) eta Ehuntze Sormen Espazioan urtebeteko matrikula.
Irabazle horiek aukeratuko dituena Xanistebanetako Jai Batzordea izango da, horko kideek osatuko dute epaimahaia.
Teknika librea erabili daiteke. Kartelaren neurria 70×50 zentimetrokoa izango da eta ‘Xanistebanak 2023’ adierazi beharko du. Udalak gaineratu duenez, genero-berdintasunaren irizpidearen zainketa ere kontuan hartuko du epaimahaiak.
Lehiaketaren oinarriak osorik irakur daitezke esteka honetan klik eginda.
Jai batzordea, bihar
Xanistebanak antolatzeko bigarren bilera egingo dute bihar. Xanistebanetako Jai Batzordea osatzen duten eragileetako kideak 18:00etan elkartuko dira, pleno aretoan.
Besteak beste, txupina nork botako duen aztertuko dute.
