HemenGuk-en azokan parte hartu ez dutenek izena eman dezakete
Ekainaren 3an egingo dute hurrengo azoka. Bertan parte hartzeko izena eman daiteke, maiatzaren 4ra arte.
Oraindik erakusmahairik jarri ez dutenei deia egin diete. HemenGuk iniziatibaren barruan, urtaro bakoitzean azoka bat egiten dute herriko artisau eta ekoizleek. Hurrengoa ekainaren 3an izango da, larunbatarekin. Udari dagokiona izango da, pixka bat aurreratuta.
2021ean hasi ziren dinamika horrekin, Oiartzungo zenbait herritar eta ekoizleek hauspotuta. Helburua ekoizleak saretu, haien produktuei ikusgarritasuna eman eta saltzea, eta kontsumitzaileekin harreman zuzena sustatzea izan dira.
Horrez gain, egunean bertan produktuak saltzetik harago, zer egiten duten erakusteko aukera izaten dute, hartara oiartzuarrek gero dendetan tokiko produktu horiek identifika ditzaten.
Izen-ematea, zabalik
Orain arte hogei bat ekoizlek parte hartu dute egindako azoketan. Ekainaren 3koan artisau eta ekoizle berriek parte har dezatela nahi dute antolatzaileek.
Horretarako izena emateko deia egin diete oraindik posturik jarri ez dutenei. Maiatzaren 4ra arte izango dute horretarako epea.
Izena emateko 943 491 862 telefono zenbakira deitu beharko dute, edo posta elektroniko bidez idatzi. Bi dira bete beharreko baldintzak: herrikoa izatea eta elikagaien ekoizlea edota artisaua izatea.
