'918 gau' dokumentala ostegunean, Ostegun Feministen barruan
Arantza Santesteban zuzendariarekin solasean aritzeko aukera izango da, baita Leire Lopez Susako editorearekin ere.
Arantza Santestebanen bizipen eta hausnarketak agertzen dira dokumentalean. Ostegun Feministak dinamikaren barruan, dokumental emanaldia eta solasaldia antolatu dituzte biharko. Arantza Santestebanen 918 gau filma ikusteko aukera izango da Landetxen, 18:30etik aurrera.
2007ko urriaren 4an atxilotu zituen Guardia Zibilak Arantza Santesteban eta beste 22 pertsona, Batasunako Mahai Nazionaleko kide izateagatik. 918 gau pasa zituen kartzelan; garaiko bizipenak eta hausnarketak islatu ditu bertan.
Patioko joan-etorri amaigabeak, igeriketa-lehiaketak, Rasharen bizipen gogorrak kartzelan… Kartzelan egon zenean jaso zituen gutunak kartoizko kaxa batean gordeta zituen, bere gurasoen etxean.
Aske gelditu eta sei urtera, eseri eta artxibo hura osatzen zuten gutunak eta argazkiak ateratzen hasi zen. Handik aurrera, grabagailu batean jaso zituen bere oroitzapenak eta zalantzak, eta 918 Gau filmean zehar azalduko ditu, memoria zatikatu baten eran. Hainbat nazioarteko sari irabazi ditu lanak.
Solasaldia eta gonbidapenak
Dokumentala bukatzean, Santesteban berarekin eta Leire Lopez Susako editorearekin solasean aritzeko aukera egongo da.
Dokumentala doan izango da, baina gonbidapenak eskuratu beharko dira. Sarrerak eskuratzeko udalaren webgunean eskura daitezke, edo bihar Landetxeko leihatilan, emanaldia hasi baino ordu erdi lehenagotik.
