Haur eta nerabeen jai batzordea larunbatean elkartuko da
Iaz hasitako bideari jarraituta, xanistebanetan beraiek protagonista izango diren ekitaldiak landuko dituzte, ikastetxeetako proposamenak aztertuz.
Iaz egindako bilera baten irudia. Iaz osatu zen lehen aldiz haur eta nerabeen xanistebanetako jai batzordea, Oinherri taldearen ekimenez. Haur eta nerabeek beraien gustuko ekitaldiak antolatu zituzten iazko festetan: disko festa, magia ikuskizuna eta uretako puzgarriak, besteak beste.
Iazko ekitaldi horiek arrakastatsuak izan ziren, eta aurten errepikatu nahi dute. Lanean hasi da jai batzordea, eta buzoiak jarri dituzte herriko ikastetxeetan.
Azken asteetan bertan proposamenak jaso dituzte, festetan zer egin eta jakiteko. Geletan jasotako proposamen horiek aztertzeko elkartuko dira datorren larunbatean, hilak 29. 17:00etan jarri dute hitzordua, Abaraxka ludotekan.
Aukerak egingarriak diren ikusi eta Xanistebanetako jai batzorde orokorrean beste eragileei zein ekintza proposatu erabakiko dute larunbat arratsaldeko bileran.
