Kulturaz Bete Arte elkartearen eta udalaren hitzarmena, aurrera
Apirileko plenoa egin dute. Bi ordenantza berri hasi dira, eta migratzaileak erregulartzeko mozioak aurrera egin du.
Hilabete falta da agintaldia bukatzeko. Atzo arratsaldean egin zuten egungo agintaldiko azkeneko plenoetako bat. Besteak beste, bi ordenantza berriri hasiera eman zioten.
Alde batetik, Eragin Linguistikoaren Ebaluazioa arautzeko ordenantza aho batez onartu zuten. Horrela, Oiartzungo egoera soziolinguistikoan eragina izan dezaketen proiektu edo plangintzak onartzerakoan, jarduera horiek euskararen erabileraren izan dezaketen inpaktua ebaluatu eta neurriak hartzeko metodologia propioa izango du udalak.
Bestetik, energia elektrikoa, gasa, ura eta hidrokarburoak garraiatzeko instalazioen aldeko udal-jabari publikoaren erabilera pribatiboagatiko eta aprobetxamendu bereziagatiko tasa arautzen duen ordenantza izan zen onartutako bigarren ordenantza. Hori ere aho batez onartu zuten.
Migratzaileei buruzko mozioa
Erregularizazioa orain izeneko kanpainaren barruan, Grupo Oarso Taldeak mozioa aurkeztu zuen, Espainiako Estatuan ezohiko egoeran dauden 500.000 migratzaileak erregularizatzeko.
Mozioak adierazten duenez, egoitza-baimena lortzeko zailtasunak dituzte, eta horrek ziurgabetasun egoera sorrarazten die. Gainera, “ekonomia irregularra” sustatzen dela salatu zuten.
Horregatik, erregularizazio prozesu berezia hasteko eskatu diote Espainiako Gobernuari. EH Bilduk eta EAJk aho batez onartu zuten mozioa [hemen osorik irakur daiteke].
Kulturaz Bete Arte
Herriko kultur eragileen sarea aktibatzeko, kultur eragileen eta kulturzaleen bilgunea osatzeko eta beraien elkarlana bideratzeko hitzarmena aurrera atera zen. Kulturaz Bete Arte elkarteak 40.000 euro jasoko ditu aurten.
Kultur arloarekin jarraituz, Soinuenea fundazioak 10.800 euro gehiago jasoko ditu, “pandemia eta KPIren igoerari” aurre egiteko. Guztira 104.000 euro jasoko ditu urtean.
