'Kontratazio falta' salatu dute Correoseko langileek
Errenteria eta Oiartzungo Correoseko langileek elkarretaratzea egin dute gaur goizean kontratazio faltagatik protesta egiteko. "Kezkagarritzat" jo dute lanpostuak ez betetzea.
Protestaren irudi bat Errenteria eta Oiartzungo Correoseko langileek elkarretaratzea egin dute gaur goizean kontratazio faltagatik protesta egiteko. “Kezkagarritzat” jo dute lanpostuak ez betetzea: “Denbora asko daramagu egoera hori jasaten. Langileak falta diren egunetan ez dira hutsuneak betetzen aurrez jakinarazten bada ere, eta horrek etengabeko pilaketak eragiten ditu banaketa bulegoetan”.
Errenteria-Oreretako Correosen bulegoaren ondoan egin dute protesta elkarretaratzea.
Gutunak eta jakinarazpenak epez kanpo entregatzea dakar egoera horrek besteak beste salatu dutenez. CCOO, LAB, ESK eta UGT sindikatuek, egoerak langileengan duen eragina gogor salatu dute. Hauteskunde kanpainari ere erreparatu diote, izan ere, lan gainkarga dakar horrek eta kezka azaldu dute sindikatuek: “Jakinarazi digute lan kontratazio txiki bat egongo dela, baina inola ere ez dela erabatekoa izango. Horrek hauteskunde banaketa osoa egitea ezinezkoa egingo du”.
