Hegazti sarraskijaleen bila ariko dira Aiako Harrian
Datorren maiatzaren 7rako txangoa antolatu du Arditurri parketxeak. Irteera gidatua egingo dute, hitzaldi eta guzti.
Arditurri inguruak ezagutzeko aukera polita izan daiteke. Aiako Harria parke naturalean habiak egiten dituzten hegazti sarraskijaleen bizimodua eta ohiturak gertutik ezagutzeko aukera emango du Arditurri parketxeak datorren maiatzaren 7an. Irteera gidatua egingo dute, eta hitzaldi labur batekin biribilduko dute txangoa. Gainera, bidean zehar hegazti horiek teleskopio bidez ikusteko aukera izango da.
Euskarazko hitzaldia 10:00etan izango da, eta gaztelaniazkoa aldiz, 10:30ean. Hauen ondoren izango da txangoa, bi taldeek batera egingo dute.
Adin guztiei begirako ibilaldia izango da, eta 12 urtetik beherakoek 5 euro eta hortik gorakoek 7 euro ordaindu beharko dituzte. Izena eman beharko da, 943 49 59 69 edo 688 89 50 68 telefono zenbakietara deituta edo helbide honetara idatziz.
