[Galeria eta bideoa] Hogeita hamabosgarrena, inauguratuta
Hasi da XXXV. Errenteria-Oreretako Sagardo Eguna. Goizeko txotxa egin eta berehala bete dute bizilagunek Linoko karpa, euritik ihesi.
12:00etako txotxa gogoz hartu dute ingurukoek. Hogeita hamabosgarrena da aurtengo Sagardo Eguna. Hiru hamarkada eta erdiz egindako ospakizunak ezer berezirik izan behar du hain luzaroan iraun ez ezik, oraindik ere arrakastatsu mantentzeko. Izan ere, eguraldia alde izan ez badute ere, harrera jendetsua egin baitiote aurten ere sagardoaren festari Errenteria-Oreretako bizilagunek, nahiz ingurutik hurbildutako nork edo nork ere.
Euriagatik Linoko karpara lekualdatu dute Foru Plazan egitekoa zen lehen txotxa. Bertan dantzariek inauguratu dute festa 12:00ak baino apur bat lehenago, eta ordu horretako kanpaiak jotzearekin batera hasi dira lehen edalontziak betetzen. Ordu erdi baino gutxiagoan, jadanik beteta zegoen sagardoa zerbitzatzeko ezarri duten karpa erraldoia. Talo eta txistorrak prestatzen ari zirenei ere ez diete atseden hartzen utzi.
Dultzainero, trikitilari, txistulari, txalapartari eta bertsolariek egun osoan zehar jarraituko dute bazterrak girotzen. 12:00etakoa lehen txotxa besterik ez da izan; 18:00etan egingo dute bigarrena Zumardian, eta ordu horretako irudiekin beste galeria bat osatuko du HITZAk. Jarraian, oraingoz, goizak utziriko zenbait une, bideo eta argazkitan.
