AHTaren kontrako bizikleta martxa deitu dute hilaren 6rako
Errenteria-Oreretan hasiko da bizikleta martxa, eta Oiartzun eta Astigarragatik pasatuko da, Donostian bukatzeko.
Aurretik egindako AHTaren kontrako bizikleta martxa baten irudia. Abiadura Handiko Trenaren kontrako bizikleta martxa antolatu dute datorren larunbaterako, hilak 6. Eskualdeko errepideak zein Astigarraga eta Donostiakoak igaroko ditu mobilizazio horrek.
Errenteria-Oreretako Gamon Zumarditik aterako da, 10:00etan, eta Oiartzunera joateko bidea hartuko du. 10:45 inguruan iritsiko da Done Eztebe plazara.
Ondoren, Astigarraga, eta Donostiako Martutene eta Loiola auzoak zeharkatuko ditu, Donostiako autobus geltokian bukatzeko (AHTak bertan izango luke geltokia).
Iritsiera ordua 13:30erako espero da. Egia auzoko txokoan elkarretaratzea egingo dute, eta bukatzean Letaman gaztetxearen bidea hartuko dute.
Bazkaria, proiekzioak, pintxopotea eta musika ez direla faltako iragarri dute antolatzaileek. Bizikleta martxarako kaskoa, ura eta hamaiketakoa eramatea gogorarazi dute, eta ibilbide osoa asfalto gainean izango dela nabarmendu.
