Pasaiako motora MUGI sisteman sartzeko konpromisoa hartu du EAJk
Eider Mendoza ahaldun nagusirako hautagaiak dio zerbitzua ematen duen enpresarekin negoziazioa "ondo bukatuko dela", eta aurki, sistemaren deskontuez gozatu ahal izango dutela herritarrek.
Eider Mendoza EAJren ahaldun nagusirako hautagaia Pasaian izan zen atzo, Loreto Osa alkategaiarekin batera herriko zenbait gune bisitatu zituen. Bisita hori probestu nahi izan du Mendozak “Pasaiako motora MUGI sisteman lehenbailehen sartuko dela bermatzeko”. Hautagaiak aitortu du prozesu hori “nahi baino gehiago atzeratzen” ari dela, eta herritarrak kaltetuak izaten ari direla. Halere, ziurtatu du sistemak eskaintzen dituen deskontuez gozatzeko aukera gertuago dagoela, haren ustez, negoziazioa “ondo bukatuko” baita.
Mendozak erantsi du badakiela herritar askok egunero erabili behar izaten dutela txalupa, eta ibilbide bakoitzeko 1,1 euro ordaindu behar dituztela. “Ezin dugu onartu hain maiz erabiltzen den garraio sistema hori MUGItik kanpo egotea, eta motora sisteman ahalik eta azkarren sar dadin lan egiten ari gara”. Hala denean, MUGI txartelarekin ordaindu ahalko dira bidaiak, ohiko deskontuarekin. Zentzu horretan prozesua “azkartzeko” konpromisoa hartu dute jeltzaleek.
“Pasaia udalerri bizia da, biziberritze prozesuan murgilduta dago eta 162 milioi baino gehiagoko hamar proiektu baino gehiago ditugu martxan. Gure eginbeharra bizilagunen ondoan egotea da, aldaketa horretan laguntzeko eta haien beharrei erantzuteko”, esan du azkenik Mendozak.
