Urmendi haur eskola doan izango da
Irakaskuntza kuota bere gain hartuko du Oiartzungo Udalak datorren ikasturtetik aurrera. Jangela bakarrik ordaindu beharko da.
Urmendi haur eskola doakoa izango da 2023-24 ikasturtetik aurrera. Izan ere, Oiartzungo Udalak jakinarazi duenez, haur eskolara bideratuko duen partida handituko du.
Orain arte gurasoek ordaintzen izan duten irakaskuntza kuota udalak ordainduko du.
Eusko Jaurlaritzak duela egun batzuk iragarri zuen Haur Eskolen Partzuergoaren bidez kudeatzen dituen haur eskolen zerbitzua doakoa izango da. Erabaki horretatik kanpo geratu ziren Urmendi eta Araba, Bizkai eta Gipuzkoako beste hamabi haur eskola.
“Erabaki horrek oiartzuarrengan sortzen duen bereizketa eta kaltea ekiditearen alde egin du udalak”, adierazi du Oiartzungo Udalak.
Urtean 110.000 euro gehiago
1999an sortu zen Urmendi Oiartzungo Udal Ikastola Partzuergoa, udalaren eta Haurtzaro Ikastolaren artean. Gaur egun 1.119.000 euroko aurrekontua du.
Orain arte 579.000 euro jartzen zituen udalak (gastu osoaren erdia), 340.000 euro Eusko Jaurlaritzak eta 200.000 euro familiek, irakaskuntza eta jantokiko hileroko kuotekin.
Familiek ordaintzen duten irakaskuntza kuota beregain hartuko duenez udalak, jakinarazi dute 689.000 euroko ekarpena egingo dutela. 110.000 euro gehiago izango dira urtean, eta zerbitzuaren finantzazioaren %62 suposatuko du.
Gurasoek, beraz, jangelako kuota bakarrik ordaindu beharko dute datorren ikasturtetik aurrera.
Neurriak, mahai gainean
Udalak hartu duen erabaki hori behin-behinekoa izango da, datorren ikasturteari dagokiona. Izan ere, hortik aurrera udal erakundeak eta Eusko Jaurlaritzak balizko irtenbideak aztertuko dituzte.
Horrez gain, udalak gogorarazi du aurrematrikula egiteko epea hastear dagoela. Datorren asteleheentik —hilak 8— hilaren 19ra bitartean izango da.
Seme edo alaba matrikulatuko duten gurasoek erabakiaren berri izateko aukera izango dute. Guraso berriek ere izango dute gaiari buruz informazioa jasotzeko.
