Kilometroak 23k badu soinu banda: 'Erriola'
Jon Maia bertsolariak sortu ditu abestiaren hitzak eta Janus Lester taldeak jarri dio musika. Gaurtik entzungai da 'Erriola' kanta
Kilometroak 2023k badu soinu banda: Erriola. Joan Maia bertsolari zumaiarrak sortu ditu Orereta Ikastolak antolatutako Kilometroak jaiaren abestiaren hitzak, eta Janus Lester talde beratarrak, berriz, musika. Gaurtik entzungai dago abestia, eta bihar, 12 orduz Erriolan kultura maratoiaren barruan joko du kanta zuzenean estreinakoz talde nafarrak. Bihar izango da hori, Agirre Lehendakariaren plazan (Lino) 21:30ean. Hala ere, gaurtik entzun daiteke abestia, audio plataforma nagusietan.
Erriola kanta osatzerakoan komunitatea, euskara eta errelatoaren bidezko aitortza izan ditu ardatz bertsolariak, “Erriola izanik leloa, euskararen mugimenduaren metaforatzat hartu dute, nola herria biltzen duen beso bat den eta aldi berean batzen duen zerbait. Eta errio horren itsasoa, herri osoa euskaraz ikustearen ametsa”.
“Jokin Pinatxo musikari beratarrak gidatzen duen Janus Lester taldeak ondu du kantuaren musika. Mattin Arbelaitz (bateria), Garazi Esnaola (Teklatuak), Ane Bastida (baxua) Javier Etxarri (gitarra), Julen Suarez (tronpeta), Andoni Arriola (tronboia) eta Jokin Pinatxo (ahotsa) taldekideek, doinu melodiko iradokitzaileak eta dantzagarriak uztartu dituzte, urriaren 1eko festarako motorrak berotzen hasteko kantu ezin aproposagoa sortuz”, esan dute Kilometroak 23ko antolatzaileek.
Erriola abestian “nahiko nabarmena” dela melodiak duela pisua esan du Pinatxok, “bai nik abesten dudanean, bai zati instrumentalean ere”.
Hirugarren aldia izango du Orereta Ikastiolak Kilometroak jaia antolatzen. 1984an antolatu zuen lehenengoz. Orduan Julian Albisturrek egin zituen hitzak kanturako ewta doinua berriz, Donato Larrañagak egin zuen. 199an antolatu zuen bigarrenez, eta orduko hartan Antton Cazabon idazlea oiartzuarrak jarri zizkion hitzak eta Golden Apple Quartetek doinua kantari.
Kantua entzuteko, hemen egin klik.
2023 Kilometroak- Erriola
Zabaldu duzu bidea
fabrika ta etxe artean
iturburua, ideiak
aro berrien arten.
Zure zurrunbiloetan
gazia eta gozoa
gogorarazi diguzu
hor dagoela itsasoa.Behera gora, nola nora
erriola!
kilometroz kilometro
itsasora! erriora!
Euskara marean gora!
erriola!
kilometroz kilometro
itsasora! erriora!Ilargia da marea
mugi dezakeen bakarra
geu gara euskararen
ilargi bete bakarra.
Alde bat eta bestea
ezkerra eta eskubia
biak batera da euskara
ibaia eta zubia.Behera gora, nola nora
erriola!
kilometroz kilometro
itsasora! erriora!
Euskara marean gora!
erriola!
kilometroz kilometro
itsasora! erriora!Zure urezko besoak
besarkatzen du herria
plaza, kaleak, auzoak
zaharra eta berria
ezkerra eta eskubia
biak batera da euskara
ibaia eta zubiaHortxe dago itsasoa
hurbila ala lausoa
hortxe dago itsasoa
euskaraz herri osoa!Hitzak. Jon Maia Soria
