Lorategi Geologikoa aire zabaleko museoa egokitzeko lanak, amaituta
Lartzabalen kokatutako Lorategi Geologikoa tona bat inguruko hamabi arrokek osatzen dute. Garai ezberdinetakoak dira guztiak eta kronologikoki kokatu dituzte. Zaharrenak, arbelak, karbonifero aldikoak dira —360 milioi urte—.
![](https://oarsoaldea.hitza.eus/site/files/2023/05/lorategi-geologikoa-lartzabalen.jpg)
Geologia interpretaziorako eremua du Errenteria-Oreretak. Lorategi Geologikoa izenarekin, duela gutxi amaitu dituzte Lartzabal auzoan kokatutako aire zabaleko museoa egokitzeko lanak. Oiartzun ibaiaren eskuin ibaiertzean, Schorndorf parkearen ondoan dago kokatuta. Oiartzun ibaiaren inguruko Paisaiaren Ekintza Planean jasota zegoen jarduketa hori; plan horrekin, Fanderia eta Iztieta arteko ibai eremua birnaturalizatzea eta ingurumena zein hirigintza lehengoratzea du helburu udalak.
Errenteriako Udalak Oiartzungo Luberri Geologia Museoaren laguntza izan du espazioa egokitzeko garaian, eta gainera, Pasaiako eta Oiartzungo udalek erakusketa iraunkor horretarako harri ugari eman dituzten doan.
Lartzabalen kokatutako Lorategi Geologikoa tona bat inguruko hamabi arrokek osatzen dute. garai ezberdinetakoak dira guztiak eta kronologikoki kokatu dituzte. Zaharrenak, arbelak, karbonifero aldikoak dira —360 milioi urte—. Oiartzun ibaiaren arroko zaharrenak ez ezik, Araba, Bizkai eta Gipuzkoako zaharrenak ere badira. Aleen artean, granitoa, konglomeratuak, kareharriak eta hareharriak daude; horietako batzuetan gainera, fosil fauna ikus daiteke.
Arroka horien gaineko informazioa erakusten duten paneletan, Oarsoaldeko minerologiaren eta bere sorreraren gaineko azalpen grafiko eta praktikoak irakur daitezke. Hala, Arditurri, Pikoketa, Jaizkibel, Arkale, Karrika, Aizpitarte, Artxipi, txoritokieta… azaltzen dira bertan. Natura baliabide horiek mendeetan izan duten erabilera ere azaltzen dute informazio panelek. Halaber, Oiartzun ibaiaren arroan barrena dauden zortzi interes geologikoko lekuak IGL kokatuta azaltzen dira.