Ku-ku Egunean, bestelako jendarte eredu bat irudikatzen duten liburu artean
Ku-ku Egunaren barruko saiek arratsaldean jarraituko dute, ipuin kontaketekin eta tailerrarekin.
Abaraxka ludotekaren, herriko feministen, eta norbanakoen ekimenari esker Ku-ku Eguna ari dira aurrera eramaten gaur Oiartzunen. Maiatzaren 17ko LGTBIQ+fobiaren kontrako egunaren harira antolatu dute bigarrenez gaurko jarduera sorta.
Batez ere literatura kutsua du jarduerak. Hala, Kontzejupeko frontoia hartu dute, eta haur eta gazte literaturako liburuekin apalategiak jarri dituzte. Liburuak ikusi eta irakurtzeko toki atsegin eta goxoa prestatu dute: alfonbrak, poof-ak, sofak… Lasai asko izan dira kontzejupeko gunean haurrak eta helduak bertan zeuden literatura lanak deskubritzen. Gainera, bi pasetan, udaletxeko areto nagusian Itsaspeko Bihotzak areto literarioa egin dute.
Irakurgaien artean, LGTBIQ+ pertsonak gaitzat dituztenak izan dira, baina aurtengoan sormen lanen gaitegia zabaltzea erabaki dute antolatzaileek. «Bagenekien LGTBIQ+ identitateak agerrarazten dituzten liburuak oso gutxi direla, eta, gainera, zeuden liburu gehienek ez dutela kalitatezko edukia eskaintzen. Horregatik gaitegia zabaltzen ahalegindu gara, genero ikuspegia, gai sozialak, aniztasuna eta abar txertatuz, bestelako jendarte eredu bat irudikatzen dutenak edo gogoetarako bide ematen dutenak».
Goizeko jarduerak eginda, arratsalderako puin kontaketa saioak antolatu dituzte, Arizmendienean. 3-5 urteko haurrentzakoa 17:00etan hasiko da, eta 5-8 artekoentzakoa, 17:30ean. 18:00etan tailerren txanda izango da: txapak sortuko dituzte, alde batetik, eta azkazalak kolorez margotuko dituzte, bestetik, Kolorezko atzazalak liburuak inspiratuta.
Jarraian, eguerdiko hainbat irudi, kontzejupean jasotakoak:
