[Galeria] Bertso egun "ahaztezina", Martzelina ospatzeko
Martzelina Bertsozale Elkarteak izen aldaketa ezagutarazi eta ospatzeko festa eguna egin du, belaunaldiak elkartuz.
Kontzejupean egin zuten ekitaldiko irudia, igande eguerdian. Oiartzungo bertso eskola zena Martzelina Bertsozale Elkartea bihurtu da. Izen aldaketa hori ospatzeko asmoz, eta bide batez Martzelina Lopetegi Olaiz omentzeko helburuarekin, festa eguna izan zuten Oiartzun eta inguruko festazaleek, igandean.
Eguerdian Kontzejupean elkartu ziren, eta Oiartzungo bertsoaren harrobitik pasatu eta pasatzen ari diren hainbat belaunaldietako kideek kantatu zuten.
Horrez gain, Karmele Mitxelenak, Iraitz Mateok eta Alaia Martinek idatzitako liburua banatu zuten (HITZAk bi ale zozkatuko ditu). Urrats paperdendan eros daiteke, baten batek bere alea lortu ez balu.
Jarraian, poteoa egin zuten, Girizia elkartean bazkaldu baino lehen. Arratsaldean ein Martzelina Bertsozale Elkarteak antolatutako estreinako saioarekin gozatzeko aukera izan zuten eskualdeko bertsozaleek, Landetxeko aurreneko bertso saioan.
Alaia Martin, Miren Artetxe, Unai Iturriaga, Maddalen Lujanbio eta Sustrai Colina bertsolariak jarri ziren mikrofono aurrean, Ainhoa Urienek jarritako gaiei hitz neurtuekin erantzuteko. Ahanztura izan zen gai nagusia, eta aretoa leporaino bete zen.
Eguna, baina, luze gogoratuko dute herriko bertsozaleek, Martzelinakoek aipatu dutenez: “Belaunaldi ezberdinak batu eta bertso mugimendua indartzeko egun ahaztezina izan zen”.
[Kontzejupeko argazkiak Amets Badiola Rubiorenak dira]
