Bahiketa saiakera bat salatu dute San Pedron
Gertaera puntuala izan dela argitu du Pasaiako Udaltzaingoak, eta egunotan zaintza poliziala indartuko dutela barrutiko zonaldean.
San Pedroko autobus geltokiaren inguruan izan zen gertaera, atzoko 14:00ak aldera. Atzotik ohartarazpen mezuak hedatzen ari dira pasaitarren artean, ahoz aho nahiz sare sozialen bidez. Izan ere, San Pedroko bizilagunek ziurtaturikoaren arabera, atzo haur bat bahitzen saiatu baitziren lau norbanako barruti horretan. Pasaiako Udaltzaingoak berretsi du horren araberako salaketa jarri zuela familia batek Ertzaintzan atzo.
Pasaiako poliziak emandako argipenen arabera, atzoko 14:00ak inguruan jazo zen gertaera. Bizikletan zihoan 12 urteko mutiko bat besotik heldu eta zegoen zonaldetik (San Pedroko autobus geltokia) aldentzea lortu zuten lau gizonek. Haurraren senideen arabera, 12 urteko gaztea “ihesi irteteko gai izan zen haietako bati ostiko bat emanda”.
Udaltzainak, gertaeraren berri izan eta berehala, aipaturiko zonaldera bertaratu ziren atzo. “Ordurako joanak ziren, antza denez, ustezko bahitzaileak”, informatu dute. Gertaera puntuala dela uste du Pasaiako Udaltzaingoak, eta mezu lasaigarria hedatu nahi izan dute, zentzu horretan, bizilagunen artean. Zaintza poliziala zorroztuko dute egunotan zonaldean.
