Proposamen berriak eta hautagaiak aurkeztuko ditu EH Bilduk, ekitaldi nagusian
Oiartzungo EH Bilduren hautagaitzak kanpainako ekitaldi nagusia egingo du ostiralean, Landetxen. CUPeko parlamentari bat gonbidatu dute.
Hautagaiak aurkeztuko dituzte ostiral arratsaldeko ekitaldian. Oiartzungo EH Bilduren hautagaitzak bihar egingo du kanpainako ekitaldi nagusia. Landetxe aukeratu dute, uztera doan gobernu taldearen harribitxia. 18:00etan hasiko da mitina.
EH Bilduk, alkatetza berretsiz gero, datozen lau urteetarako planen berri emango du. Joana Mendiburu zerrendaburuak aletuko ditu, gainontzeko hautagaien laguntzarekin.
Ohar baten bidez jakinarazi dutenez, EH Bilduren ekitaldiak bi ezaugarri izango ditu. Alde batetik, hautagaiak herritarrei aurkeztea. Bestetik, datozen lau urteetako “erronkak” modu “hurbilean” eta “dinamikoan” aurkeztea.
“Erronka” horietako batzuek zeintzuk izango diren aurreratu du ezkerreko koalizioak: “Udaleko Ongizate sailak izango duen lehentasuna azpimarratuko da, ekonomia sozialerako sail berria aurkeztuko da, kultura eta euskara loraldian jarriko dituzten egitasmoen berri emango da eta feminismoa eta herritarren parte-hartzea bezalako gaiak landuko dira”.
Botran, gonbidatu
CUP Herrialde Katalanetako alderdi politiko independentistaren ordezkari bat gonbidatu du EH Bildu: Albert Botran Pahissa. Espainiako Kongresuan diputatua da.
“Oiartzunentzat interesgarriak” izan daitezkeen gaiak izango ditu hizpide, bere esperientziatik, hala nola katalanaren erabileraren sustapena, ekonomia soziala eta gazteek politikarekin duten lotura.
