Jubilatuen egoitza berria gaur ireki dute
Egunero hamabi orduz irekita egongo da Landetxeko txoko berria. Jubilatuen elkarteak funtzionamendu berria izango du.
Landetxe funtzionamendu betean da. Aste hasieran euskalgintzako eragile batzuk izan ziren aterpe hartu zutenak, eta gaur jubilatuen egoitza hasi da martxan.
Lehen solairuan dagoen txokoa txukunduta, Oiartzungo 3.000 erretiratuek aterpe berria izango dute. Elkar ezagutzea, saretzea eta gozatzeko tokia izango dela ziurtatu du udalak.
Herriko jubilatuekin lanean aritzen diren eragileek elkarrekin kudeatuko dute egoitza berria eta edonork izango du proposamenak egin eta jarduerak antolatzeko aukera.
Tailerrak, kultur ekitaldiak, hitzaldiak, formazio saioak eta abar antolatzeko, udalak 15.000 euro bideratuko dizkio Gazte Izanak elkarteari.
“Beharko balitz”, jarraitu du udalak, “ekarpena handitzeko konpromisoa ere badugu, adinekoak saretzea eta zahartze aktiboa bultzatzea baita udaletxearen helburu nagusietako bat”.
Egoitza berriak 173 metro koadroko azalera du. Egongela handi bat, tailer gela bat, ile-apaindegia eta podologoa ditu. Jubilatu guztiek erabil ditzakete zerbitzu horiek, nahiz bazkide ez izan.
Taberna ondoan dago, eta jubilatuek prezio merkeagoak dituzte, %20 gutxiago.
Auzo bilerak
Gazte Izanak jubilatuen elkartea izango da Landetxeko egoitzaren kudeaketaz arduratuko den eragileetako bat. Bertan izango du bulegoa.
Martxoan onartu zituen elkartean estatutu berriak eta zuzendaritza batzordea osatzeko prozesua abiatu dute.
Hamahiru kide izango ditu; horietako bederatzi auzoetako erretiratuen ordezkariak izango dira, Elizaldeko bi eta gainontzeko auzoetako bana. Zuzendaritza osatzen duten beste lauak zuzendaritza batzordeko kideak izango dira.
Auzo bakoitzak bere ordezkariak aukeratzeko bilerak egingo ditu. Honakoa izango da egutegia:
- Ekainak 2 Arraguan, Aldeguna elkartean.
- Ekainak 6 Ugaldetxon, auzo lokalean.
- Ekainak 9 Iturriotzen, auzo lokalean.
- Ekainak 13 Altzibarren, auzo lokalean.
- Ekainak 16 Karrikan, Artaso elkartean.
- Ekainak 20 Ergoienen, auzo elkartean.
- Ekainak 23 Elizalden, Landetxeko lokal berrian.
- Ekainak 27 Gurutzen, Bizardia elkartean.
