"Ongizate sozialean eta modernizazioan, Europaren buru bihurtuko du gure proiektuak Errenteria"
2011-2015 agintaldian izan zuen azkenekoz ordezkaritza Errenteriako Udalean PP alderdiak, zinegotzi bakarrarekin. Alderdi Popularraren zerrendaburua Antonio Vicente Zubikoa da.
Zergatik eman behar diote botoa herritarrek zuk ordezkatzen duzun proiektu politikoari?
Errenteria herri osoaren kohesio sozial eta politikoa lortzeko proiektua delako gurea. Izan ere, dugun proiektu sozial eta ekonomikoak Errenteria Europaren buru bihurtuko du, ongizate sozialean eta udalerriaren modernizazioan.
Alkate bazara zein izango da egingo duzun lehenengo gauza?
Alderdi politiko guztietako ordezkariekin bilduko nintzateke, jakina, bide orri komuna abiatzeko elkarrekin. Argi dut gizarte gisa aurrera egingo genukeela horrela. Hainbeste ika mika politikoekin eta irtenbide eskasekin nekatuta dago jendartea, eta herriarentzat lan egitea dagokigu, Errenteriarentzat eta bere etorkizuna eraikitzeko.
Populazioaren %25 65 urtetik gorakoa da. Eros ahalmena bermatzeko pentsio nahikoak ere ez dituzte kasu askotan, zer esanik ez emakumeak diren pentsiodunen kasuan. Zein politikak jarriko dituzue martxan adinekoei erantzuteko?
Kasu bakoitza indibiduala da, eta hortaz, bakoitzari urgentziaz, ahalik eta azkarren erantzun bat eman beharko genioke ez daitezen babesgabe gelditu. Ez litzateke, hala ere, bidezkoa izango arau orokor bat egitea, pentsiodun ugari kaltetu eta beste batzuei mesede eginez.
Hamar Errenteriarretik batek egiten du euskaraz kalean. Ezagutza %42koa eta erabilera %10,9koa. Neurririk aurreikusi duzue erabilera sustatzeko?
Euskadin elebitasuna oso garrantzitsua da gure kulturaren parte delako. Errenterian migrazioak ere ,pisu handia du, bestalde. Guztiei eman behar zaizkie erraztasunak bertako hizkuntzarekin integratzeko.
Herritarrek, euskara gutxiago edo gehiago erabiltzearen inguruan eragitea zailagoa iruditzen zait, egungo ereduak derrigorrezkoak izateak, gutxiestea ere badakar nire ustez, eta zaildu euskara erabiltzea.
Herri bat, 15 auzo. Zein garrantzia dute auzoek zuk ordezkatzen duzun proiektu politikoan?
Auzo bakoitzak bere arazoak ditu, bere beharrak, eta noski horrek auzo bakoitza, banan bana aztertzea eta eskatzen du irtenbide eraginkorrak emateko. Auzoak hoberen ezagutzen dituztenak eragile sozialak dira, baita haietan dauden arazo edo kezka nagusiak ere. Hortaz, eragile horiekin batera egin beharko dugu aurrera errenteriarren ilusioa berreskuratzeko.
Alkatetza erdiesteko edo eroso gobernatzeko alderdi arteko itunak aurreikusi dituzue. Norekin?
Alderdi popularra, eta neu bere ordezkari gisa, Errenterian beti izango gara prest akordio politiko puntualak egiteko beste alderdiekin, beti ere, herriaren hobe beharrez bada. Izan ere, gure helburua eraikitzea da, ekitate soziala eraiki nahi dugu, eta ez suntsitu.
OARSO BIDASOKO HITZAk herri guztietako alkategaiei egindako elkarrizketak publikatuko ditu. Hautagai horiek HITZAk emandako galdetegi bat erantzun dute, eta herri bakoitzeko alkategai guztiei galdera berberak egin zaizkie. Elkarrizketak 2019ko udal hauteskundeen emaitzen arabera publikatuko ditu HITZAk, boz gutxien jaso zituen alderditik hasita, gehien bere egin zituenera arte.
Honakoa Errenteria-Oreretako lehenengo elkarrizketa da.
