Lezoko hauteskundeak, Bekoerrotan
Igandeko udal eta foru hauteskundeetako mahai guzti-guztiak herriko kiroldegian jarriko dituzte. Aparkalekuan murrizketak izango dira.
Lezoko Udalak iragarri du herriko hauteskundeetako mahai guztiak Bekoerrota kiroldegian jarriko direla. Hau da, aurtengoetan Lezo Herri Eskolan ez da mahairik izanen: den-denak kiroldegian ezarriko dituzte. Igandean mahaietan lanean egongo diren lezoarrek ederki asko dakite hori, baita etxean hauteskunde batzordearen jakinarazpena jaso dutenek ere. 09:00etatik 20:00etara eman daiteke botoa igandean.
Aldi berean, udalak iragarri du emaitzen berri zuzenean izateko Gipuzkoako Foru Aldundiak webgunea egokitu duela Emaitzez aparte, beste hainbat informazio daude bertan, hauteskundeekin harremana dutenak.
OARSO BIDASOKO HITZAk ere egunaren jarraipen zehatza egingo du, bere webguneetan ere hauteskundeei begirako atal berezia sortu duelako. Bertan, alkategaien informazioa, aurreko hauteskundeetako emaitzak, alkategaiei egindako elkarrizketak eta bestelakoak ikus daitezke.
Arraitokin, plaza gutxiago
Mendekosteetako atrakzioak Arraitokin jarriko dituzte. Horrek esan nahi du inguru horretan aparkatzeko plaza gutxiago izango direla datozen egunetan, igandea barne: 50 bat tokitara mugatuko dute bertako edukiera. Beraz, Bekoerrotara bozkatzera autoz joan nahi dutenek aparkatzeko zailtasunak izango dituzte ibilgailua egoki uzteko. Udala, hala ere, inguruko beste leku batzuetan aparkalekuak egokitzeko lanean ari da.
