Herritarrena da hitza
Errenteria-Oreretako 30.507 herritar daude deituak gaur botoa ematera, 2019ko hauteskundeetan baino 202 herritar gutxiago dira. Hamasei hautesleku eta 48 mahai zain dira botoak jasotzeko.
2016ko Eusko Legebiltzarrerako Hauteskundeak Oreretan Goizeko bederatzietan zabalduko dituzte ateak Errenteria-Oreretan udal eta foru hauteskundeei begira prestatu dituzten hamasei hauteslekuek eta 48 mahaiek. Hemen klik eginda kontsulta daitezke hautesleku horiek. Errenteria-Oreretako 30.507 herritar daude deituta botoa ematera gaur, 2019ko hauteskundeetan baino 202 herritar gutxiago, eta horietako bakoitzak bi boto paper aukeratu beharko ditu: udalerako bata, eta Gipuzkoako Batzar Nagusietarako bestea.
Aurtengo udal hauteskundeetara bost hautagaitza aurkeztu dituzte; egun udalean ordezkaritza duten lau alderdiena, EH Bildu, PSE-EE, EAJ, eta Elkarrekin Errenteria, eta ordezkaritzarik ez duen PPrena. Zerrendetan, lehen postuan, alkategai izateko hiru emakume— EH Bilduren hautagai Aizpea Otaegi; EAJren hautagai Elixabete Murua; eta Elkarrekin Errenteriaren hautagai Maite Gartzia—, eta bi gizon — PSE-EEren hautagai Isaac Palencia, eta PPko hautagai Antonio Vicente—.
HITZAk hauteskundeen jarraipen zehatza egingo du egunean zehar, Errenteria-Oreretako parte hartzea datuen berri emanez, baita emaitza jakinarazteko ere.
Arratsaldeko zortzietan itxiko dituzte hauteslekuak, eta ordura arte aukera izango dute, beraz, errenteriarrek botoa emateko.
21 eserleku daude gaur jokoan eta aginte makil bakarra; hitza, herritarrena da.
HITZAk atal berezia du orain arte hauteskundeen gainean landutako albisteekin. Klik egin hemen hori bisitatzeko.
