Festetan, demokrazia ariketa lasaia oraingoz
Inolako arazorik gabe hasi da hauteskunde eguna Lezon. Gaua luzatu dutenak ere boza ematera joan dira, mendekosteak baitira.
Lasai joaten ari da goiza. Mendekosteak eta hauteskundeak gaur Lezon. Herriko festak, eta herritarren demokraziaren festa. Ez da lehen aldia hauteskunde batzuek mendekosteekin bat egiten dutela. Hala da aurten. Giro berezia gaur herrian, eguraldi ederrarekin gainera.
HITZAk jaso dituen arabera, Lezoko mahai guztiak normal osatu dira, eta 09:00etan inolako arazorik gabe hasi dira lezoarrak euren aukeren alde bozkatzen pixkanaka-pixkanaka. 09:20 inguruan, gaua luzatu duten bi kuadrilla joan dira Bekoerrota kiroldegiko bozkalekura, bat neskena bestea mutilena. Gau ederra pasata. ongi gosalduta, eta animoso. Mendekosteen zaleek, beraz, euren festa gogoa eta demokrazia ariketa uztartzeko aukera izan dute.
Festetako barrakak bozkaleku den kiroldegiaren ondoan jarri dituzte. Horrek ekarri du bertako aparkaleku plazak murriztea. Beraz, bozkatzera joango direnei udalak eskatu die ahal bada oinez joan daitezela Bekoerrotara.
20:00etan itxiko dute boza emateko aukera. Ordura arteko orduak lasai joango direla espero da. Hortik aurrera, kontaketa eta alderdi politikoetako ordezkarien urduritasunak.
