Energiaren erabilera eraginkorragoa izateko proposamenak helarazi dizkiote udalari
Eskolako Agenda 2030 barruan, herriko ikasleek ikasturtean zehar landutakoa aurkeztu diete udal ordezkariei. Zortzi eskaera eta hamar konpromiso dira.
Atzo udal ordezkariekin elkartu ziren. Eskolako Agenda 2030 proiektuaren barruan, Elizalde Herri Eskola eta Institutuko eta Haurtzaro Ikastolako 750 bat ikaslek Oiartzunen energiaren erabilera jasangarriagoa nola egin landu dute.
Udalerriaren egoera hobetzeko ekarpenak jasotzea izan da helburu nagusia. Oiartzungo diagnosia egin eta energia gutxiago erabiltzeko zer egin daitekeen hausnartu dute.
Alde batetik, norberak har ditzakeen neurriak aztertu eta konpromisoak hartu dituzte ikasleek. Bestetik, ikastetxeetan eta udalerrian energia kontsumoa jaisteko zer egin daitekeen ere lan dute.
Herrirako landu dituzten proposamenak aurkeztu zizkieten atzo udal ordezkariei, pleno aretoan bilduta.
Zortzi eskaera eta hamar konpromiso
Kaleko argian behar direnean bakarrik piztea, faroletan LED argian jartzea, eguzki plaken instalakuntzak egitea… Energiaren erabilera eraginkorragoa izateko zortzi proposamen egin zizkioten udalari.
Agustin Lekuona jarduneko Hirigintza zinegotziak jaso zituen, eta banan-banan erantzuteko konpromisoa hartu zuen. Energia trantsizioan eta burujabetzan elkarrekin lanean jarraitzera animatu zituen ikasleak. “Guztion ahaleginari esker lortuko baitugu Oiartzun jasangarriagoa, ekologikoagoa eta berdeagoa”, helarazi zien.
Udalari proposamenak
- Herriaren egoera eta erabilera energetikoa hobetzea. Adibidez, egun eguzkitsuetan kaleko argiak beranduago piztea.
- Ikastetxeetan eta kaleko faroletan LED argiak jartzea.
- Kaleko argiak behar direnean bakarrik piztuta egotea.
- Energiaren kontsumoa gutxitzeko proiektuak egitea.
- Ikastetxeetan belar eta natura eremuak edukitzea.
- Etxeetan eta herriko beste hainbat eraikinetan eguzki plakak jartzea.
- Faroletan mugimendu sentsoreak jartzea.
- Autobus publikoak auzo guztietara iristea.
Ikasleen konpromisoak
- Ur beroa ahalik eta gutxien erabiltzea.
- Bertako edo gertuko produktuak erostea.
- Gelako argiak itzalita edukitzea eta eguzkiaren argia erabiltzea gaua izan arte.
- Ahal badut, oinez, bizikletaz edo patinetez mugituko naiz.
- Nire energiaren erabilera kontrolatzea, eta besteei ere hori adieraztea.
- Dutxan ahalik eta denbora gutxien egotea.
- Entxufe guztiak deskonektatzen saiatuko naiz.
- Garraio publikoa gehiago erabiltzea.
- Berogailua behar denean soilik erabiltzea.
- Hozkailua denbora gutxiz izango dut irekita.
